Heimasíða geirag í óákveðinn tíma

Í fyrsta lagi: Sjaldan hef ég séð hallærislegri sjón en í gærkvöldi þar sem ég spítti nánst út úr mér góðum bjórsopa þegar ég datt inn á djassleik í sjónvarpinu. Þar var einhver rauðhærður mannauli með svip eins og maður að lyfta nokkur hundruð kílóum og rauður í framan sem afleiðing af því. Hann var samt ekkert að rembast við neitt nema að koma frá sér frekar bara venjulegu og ekkert voðalega spennandi djasslagi og var sum sé að spila á gítar. En þarna stóð hann með rembingssvip og venjulegan á víxl og ég skipti fljótt um stöð.

Í öðru lagi: Núna er vefleiðarasamfélagið orðið vel þanið. Ég sé ekki betur en nánast allir sem kunna að skrifa á heimasíður séu með weblogg í gangi. Flestir af þeim síðan að blogga. Misviturlegar athugasemdir um daginn og veginn eins og sú sem ég var enda við að skrifa. Því miður verð ég samt að segja að þetta er að missa marks hjá mér sem lesanda. Ég er löngu hættur að nenna fylgjast með þróuninni og les kannski 3-4 vefleiðara reglulega og hina sjaldnar eða aldrei. Því miður enda er eflaust margt gott í gangi mun víðar en ég nenni að skoða.

En hvað um það. Mér er farið að leiðast þetta sjálfur og smám saman mun ég kúpla mig út og hætta þessu. Ég sé ekki lengur tilganginn í því að hugsa upphátt á heimasíðunni minni þótt hann sé eflaust einhver í raun og veru. Kannski kemur löngunin aftur, kannski finn ég fyrir fíkn sem ég finn ekki í dag og fer að skrifa aftur. Kannski er betra að skrifa frekar pistla um málefni vikunnar eða pistla um einstök málefni. Kannski í bland við daglegu skrifin eins og sumir. Þetta verður ígrundað eitthvað. En núna hef ég sem sagt ákveðið að kúpla mig út úr vefleiðarasamfélaginu að minnsta kosti um stundarsakir. Ég þakka lesendum fyrir að nenna að lesa. Bless.

@6:56:59 PM | path

Núna er ég allur í sárum og rifnum blöðrum á lófunum eftir heljarinnar uppstungu og áburðarsáningu í litla kartöflugarðinum þeirra ömmu og afa. Bakið er einnig ekkert glatt í dag. Þetta var samt gott verk og uppskeran í haust verður eflaust þeim mun betri á bragðið fyrir vikið þótt bara sé verið að tala um nokkrar karftöflur. Þetta vita allir sem hafa eitthvað stungið í jörðina. Í verðlaun var svo dýrindis læri og ís í eftirrétt en eins og allir vita líka þá bragðast fátt betur en matur hjá ömmu.

Ætli gamalt fólk sé ekki stórkostlega vanmetið? Ég er að komast að því bara þessar vikurnar að heimsókn til ömmu og afa er vægast sagt skemmtileg. Það er eins og maður fái spark í rassinn og sé neyddur til að líta á ýmsa hluti í öðru samhengi þegar maður hefur fengið álit fólks sem hefur lifað tímanna tvenna í íslensku samfélagi. Afi á lítinn bát og er því til dæmis beinn þátttakandi í fiskveiðistjórnarbrandaranum á Íslandi. Hann þurfti meira að segja að ganga í ákveðin mál sjálfur í vor til þess eins að fá stjórnvöld til að standa við ákveðin loforð sem þau gáfu bátaköllum. Það er löng saga og verður ekki sögð hér nema vilji sé fyrir því. En afi er karl í krapinu og það fengu skriffinnarnir í Sjávarútvegsráðuneytinu að finna fyrir þegar þeir loksins gáfu eftir ákváðu að standa við sín fyrri loforð. Húrra fyrir afa!

@8:21:34 PM | path

Allir hafa sitt að segja um ágæti samfélagsins og gagnrýna það sem þeim finnst gagnrýni vert og tekst misvel til. Ég held samt að enginn hópur manna hitti naglann eins vel á höfuðið og góðir grínistar! Þetta er alveg rétt hjá mér. Grínistar byggja oft grínið upp á því að benda á hluti sem við þekkjum öll, draga fram einhvern óaugljósan fáránleika, setja hann síðan í ákveðið samhengi og niðurstaðan er hlægjandi salur. Við myndum varla hlægja á sama hátt ef grínið væri bara algjör steypa? Það er önnur tegund húmors. Seinfeld er dæmi sem allir ættu að þekkja. Hann bendir á hina og þessa hluti sem allir þekkja og af einhverjum ástæðum hlægja allir í kringum hann. Það hlýtur þá að vera eitthvað gott efni á bak við það sem í fljótu bragði virðist bara vera gott grín. Það hlýtur að vera eitthvað sem er í raun og veru gagnrýni vert sem við hlægjum að. Annars værum við varla að hlægja! Skjátlast mér?

Ég tók smá gagnrýnikast sjálfur um daginn. Ekki í umbúðum gríns samt. Ég man ekki hvað kom til en allavega var afleiðingin langur, sundurlaus pistill um samfélagið! Já hvorki meira né minna! Þeir sem eru óskaplega spenntir fyrir þessum skrifum er bent á að smella hér!

Jenna Jameson

Einstaka sinnum fæ ég póst frá Jennu Jameson-aðdáendum sem hafa dottið niður á mína eigin Jenna Jameson-síðu. Í dag fékk ég slíkan póst og ætla því að auglýsa síðuna hér með og setja link á hana er hér!

@7:05:45 PM | path

Í kvöld kemur í ljós hvaða stelpa einhver dómnefnd velur sem flottustu kellinguna á Íslandi. Ég ætla að horfa á herlegheitin í beinni með öl í hendi og vini í grennd. Það er samt sjaldnast þannig að flottasta kellingin í raunveruleikaum hljóti titilinn. Venjulega dettur dómnefndin niður á eitthvað "spes" útlit og "týpu" og ég er ekki alveg nógu sáttur við það. En svona er tískan. Hvað veit ég um hvað er í tísku? Ekki neitt.

@5:32:38 PM | path

Þessa dagana er ég að blaða gegnum bók sem ég eignaðist árið sem ég fermdist en hefur lítið annað gert gegnum tíðina en að safna ryki. Þetta er kannski ekki mest spennandi bókin en fróðleg engu að síður. Hún heitir Íslenskt málfar (höf. Árni Böðvarsson, Almenna bókafélagið, 1992 ... fyrir áhugasama!). Þarna kennir margra grasa og óhætt að segja að bókin kveikir í manni löngun til að varðveita íslenska tungu og beita sér fyrir vandaðri málnotkun. Ég læt þó vera af predikun um íslenska tungu og menningararf í bili en sjáum hvað setur þegar ég er búinn að fá nóg af þessari bók. Hugsið ykkur, í Frakklandi er frönskuráðherra!

Hilluskraut

Eiga allir biblíu? Verður maður ekki að eignast biblíu? Þá helst þá biblíu sem frelsaðir líta helst til sem bestu þýðinguna úr frummálinu, King James Bible. Ef menn ætla að kaupa eitthvað þá er vissara að hafa það sem upprunalegast og áreiðanlegast ekki satt? Reyndar á ensku en ég er fullorðinn maður og ætti að ráða við það ef ég ákveddi að gera biblíuna mína að meira en hilluskrauti

@6:44:30 PM | path

Jæja þá er Arnar formlega orðinn jakkalakki (skyldleiki við við orðin 'kakkalakki' og 'jakkaföt' er ótvíræður). Allt gott um það að segja. Menn hérna í skólanum eru jú meira og minna að mennta sig í að verða jakkalakkar. Það borgar best.

Ég vil mæla með því við fólk að fara núna með biluð raftæki sín í Heimilistæki til viðgerða. Bróðir minn var að fara á samning hjá þeim og byrjaði í dag og hann heimtar æfingu! Eitthvað krefjandi. Ég lofa því að tækin ykkar verða í góðum höndum. Biðjið bara um Ómar Ómar!

Kellingar!

Næsta laugardag verður Fegurðarsamkeppni Íslands sýnd í beinni á Skjá einum (að sjálfsögðu!). Þetta er möst-sjónvarpsefni og ég mæli með að ég haldi bara partý og horfi á þetta á meðan! Skrýtin meðmæli? Menn skulu muna að velja GSM-stúlkuna fyrir keppnina. Það er líka möst.

@5:04:13 PM | path

Núna hef ég móttekið bréf frá hvorki meira né minna en stjórnarformanni RHÍ og úrskurður hans varðandi heimasíðu mína er sá að ég fái ekki vefsvæðið fyrr en 31.desember en held þó notendanafni mínu. Svarið kom seint og það var stutt og svaraði engu um hvað það var sem ég gerði af mér. Þetta er náttúrulega bara sorg. Um leið og ég nenni (lesist: í haust þegar ég á að vera læra) mun ég æða á skrifstofu einhvers sem þykist vita hvað ég braut af mér (ítrekað og endurtekið .. eins og það er alltaf orðað) og fá að vita hvað samræmdist ekki notendaskilmálum RHÍ. Skrifaði ég eitthvað um forsetann? Nei! Fundu þeir vibba-möppuna meðan hún lét sem hæst? Veit ekki. Var of mikið af berum kvenmannslíkömum í 'erótískum' stellingum á heimasíðunni? Ég veit ekki. Látum það rætast.

Ég er búinn að ráða mig munnlega til Orkuveitu Reykjavíkur og hef störf þar næsta mánudag EF ég finn ekkert annað og enn eru blikur á lofti um það. Þeir borga svívirðilega og ég ætla að reyna til hins síðasta að fara ekki til þeirra. Veit hið opinbera og þeirra stofnanir ekki að léleg laun skapa vonda starfsmenn? Er þetta ekki námsefni fyrstu vikunnar í öllum rekstrarnámskeiðum? Reyndar fengi ég bíl til afnota og gsm-síma á þeirra kostnað í vinnunni en þessu eftirlitsstarfi fylgir gríðarleg skýrsluútfylling og annað í þeim dúr. Ekki alslæmt en á endanum hlýtur maður alltaf að skoða launin í lok dags.

Í gærkvöldi var snilldarmynd á Stöð 2: Starship Troopers. Þetta er rándýr B-mynd eins og þær gerast bestar og ég sat límdur við skjáinn allan tímann. Áfram Paul Verhoven!

@1:01:45 PM | path

Blogger er núna búinn að drepa tvær tilraunir til uppfærslu svo þessi verður stutt.

Ég púa á B&L fyrir að reyna troða upp á saklausa kaupendur nýju módeli af Hyundai Accent, að þessu sinni með hjálp slagorðsins "Hyundai Accent - allt annar bíll". Það dugir ekkert minna en nákvæmlega það til að ég svo mikið sem virði þennan bíl viðlits eftir þær reynslusögur sem ég hef heyrt af þessari tilteknu bíltegund. Kannski er hann ekki sem verstur, en sögurnar eru samt til staðar!

@8:32:59 PM | path