Computers
Associazioni
| Computers |
|
melegnano.net | |
Melegnano.net
Associazioni |
 |
|
 |
| Sèmm donca in del 1002 e precisament al vintitrii de Gennar
e l’è propi quèll dì che moeur Ottone III°. Siccome..
“mort el Re evviva el Re”, ven incoronaa Re d’Italia, Arduino, marches
d’Ivrea. Ma pur tropp in su’l trono el ghe sta pocch, perchè in
del 1004, Enrico, Imperator de Germania, el ven in Italia, el manda coi
gàmb a l’aria Arduino e da la Dieta de Pavia el se fa proclamà
Re d’Italia cont el titol di Enrico I°. Subit el ten on parlament a
Pontelungo, che l’è on paes tra Pavia e Milan, e là el ricev
el giurament di Lombard. Ma purtropp sètt mes dopo Milan el g’ha
ona visita inaspèttada e minga cèrt desiderada: la pèste
cont tutt i so bèi amenicoi. In del 1008, l’Arcivèscov Arnolfo,
faa dopo la mort dell’Arcivèscov Guidone, e cioè in del 998,
el tira aprèss on cèrto numer de gent armada, la porta a
Asti contra el Vèscov Olderico e le mèna a Milan presonee.
Anca Enrico I° el fa lavorà la zècca battend moneda d’argent
cont le leggende: Mediolanum - Henricus rex e
i così detti ottolini finissen de vègh cors regolar. Des
ann dopo moeur l’Arcivèscov Arnolfo e al so post ven elètt
Ariberto da Intimiano. In del 1025, Aribert el fa ona scappada a Costanza
a trovà Corrado il Salico, cont l’intenzion de riconossel Re d’Italia.
Dopo duu ann, Aribert, el voerr imponegh a Lod on prelato de so gust, ma
che i lodesan el voeuren nanca rostii cont i scigoli, come se dis; strètta
la cittàa d’assedi Lod ghe tocca ced, purtropp, ma in del coeur
di lodesan còva on odi terribil e g’hann minga tort. Corrado il
Salico el ven incoronaa Re in del 1028. In del 1030 Benedetto Ronzone e
Ferlenda, soa miee, fonden la gesa de la S. Trinità, incoeu S. Sepolcher.
Corrado el fa la soa entrada a Milan domà in del 1037, ma per la
veritaa i milanes g’hann minga faa troppa bèlla cera. Allora
lu, per riconoscenza, el fa presonee e portà a Piacenza l’Arcivèscov
Aribert el qual, dopo duu mes, cont on strattagèmma el rièss
a scappà de preson e tornà a Milan, dove el ven ricevuu a
brasc avèrt, ma i milanes g’hann una paura malarbètta de
Corrado e impienissen de monizion i cent torr che circondaven la cittaa.
Vattafarti!... Corrado.. se le mètt minga in saccoccia, el se porta
cont on esèrcit in vicinanza de Milan, tra Porta Cines e Porta Romana,
ma i milanes fann prodigi de valor, specialment on cèrto Eriprandi
Visconti. Corrado, vist che gh’è pù nient de fa, el se ritira
pussee che a la svèlta sotta Corbètta e l’assedia el castèll
de proprietaa dell’Arcivèscov Aribert. Corrado, podend minga batt
el cavall el batt la sèlla.Papa Benedetto IX°, che me dispias
a dill, l’è de scandalosa memoria, istigaa da Corrado, el scomunica
Aribert, ma a lu ghe fa come Rosina; el sona a raccolta e l’inventa el
Carroccio del qual parlaroo pussee avanti. El trii de Giugn del 1039 Corrado
el moeur e i milanes riacquisten la paas e la tranquillitaa e quèi
gh’è minga danee che je paga. In l’istèss ann se fonda la
gesa de S. Giovann sul Mur. Ma la tranquillitaa l’è de poca durada
perchè trii ann dopo s’cioppa la guèrra civii. I milanes
hinn stuff dei giogo che je costring a servitù e rièssen
a mandà via i nobil e anca l’Arcivèscov, ma quèsti
troeuven di mercenari e strengen d’assedi Milan e i continov scaramocc
duren la bellèzza de trii ann. On cèrto Lanzone, nodar e
giudes del sacro palazzo che l’aveva biasimaa i nobil dandengh reson al
popol, el ven, dal popol stèss, acclamaa come capp. Perchè
i assediaa podèssen resist a longo, la cittaa la ven divisa in ses
rion che ciappen el nomm di port principai che hinn: la Romana, la Ticinese,
la Vercellina, la Comasina, la Nuova e la Oriental. Ven, come mèsso
regio, mandàa da l’Imperator de Germania, per quanto minga nancamò
incoronaa Re d’Italia on cèrto Adelgerio per vedè de conclud
la paas tra i nobil e el popol, ma gh’è nient de fa, perchè
se vun l’è dur, l’alter l’e pussee dur anmò. In del 1044
Lanzone, capitani del popol milanes, vist de podè minga seguità
a tegnì tèsta ai assediant, el se travestiss e el va foeura
de la cittaa per andà da l’Imperator Enrico. Ricordand però
che anca i can mènen minga la cova per nient, el ghe porta on bordèll
de regai de valor. L’accoglienza l’e bona e i promèss hinn tanti,
ma ritornand a Milan l’ha d’ave pensaa che fidass è bene e fidass
no l’è mei ancamò, inscì el cerca de ottegnì
on abboccament coi nobil che assedien la cittaa e infatti cont lor el sottoscriv
i preliminari per la paas. On ann dopo moeur Ariberto e ven nominaa Arcivèscov
Guidone da Velate. Ven poeu a Milan on cèrto Azzone, che’l dèrva
el so bravo tribunal in nomm de Re Enrico, propi in Cordus, in la cà
dove stava Arivaldo, giudes de la cittaa. Finalment tucc i cittadin se
radunen a consilli general per opera de Lanzone in d’on local che l’era
on antico teatro romano, minga de la “Suvini e Zerboni”, propi in faccia
a la gesa de S. Vittor al Teater. La paas la ven stabilida definitivament
a la Dieta de Roncaglia, president Enrico II° de Germania, in del 1055.
In del 1056 moeur Enrico II° e va sul trono Enrico III° de des
ann. Siccome su on Re de quèll’etaa lì gh’è pocch
de fa assegnament, Milan el se regg a repubblica. In del 1066 la cronaca
la fa cenno diffusament a cèrti contrad che quai voeuna la gh’è
ancamò incoeu... riveduda e corrètta, come quèlla
di: Spadari, Manganatori, Cappellari, Orefici, Mercanti, Bindellai, Pescheria
Vecchia, ma ne parlarèmm a so temp. Causa la scostumatèzza
di pret, Arialdo e Erlembaldo predichen contra a tanta immoralitaa, fasend
nass di torbid che duren ona cialada... des ann appèna. In del 1061
on incendi el distrug la basilica de S. Lorenz e moeur l’ArcivŠscov Guidone;
e in del 1073 on alter incendi el distrug la basilica de S. Steven anticament
ciamada S. Zaccaria. On tèrz incendi el distrug anca quèlla
de S. Tecla, dètta estiva, perchè a quanto par, allora, gh’era
i ges d’estaa e i ges d’inverno. Ven elètt Arcivèscov de
Milan Tebaldo castiglione el scisma del qual, però, l’è mai
staa riconossuu da la Curia Romana e inscì Milan el ven sottopost
a lu e interdètt. In del 1085 Tebaldo el cèssa de viv e ven
consacraa Arcivèscov Anselmo III° de Rho. Milan el rièss
a sottrass a la dipendenza de l’Impero sotta Enrico IV° e V° per
quanto riguarda i affari governativ e in del 1093 tutt se riconcilia cont
la Curia Romana sotta el Papa Urbano II°. Ven poeu a Milan, come Re
d’Italia, Corrado, fioeu d’Enrico de Germania, incoronaa a S. Ambroeus
propi da l’Arcivèscov Anselmo de Rbo che, pover diavol, el moeur
el quatter de Dicember e al ses ven faa Arcivèscov el milanes Arnolfo
II° che’l g’ha anca lu la malinconia de morì dopo quatter ann,
per lassagh el post a Anselmo IV° da Bovisio. Sèmm in del 1100,
in piena repubblica, a la tèsta de la qual gh’è l’Arcivèscov
Anselmo, che’l ciama el consens del popol rappresentaa dai consol, scèlt
da trii ordin de elettor. I capitani eren i pussee nobil, i valvassori
i men nobil e i cittadin eren i plebèi. Ottegnuu el consens de quasi
cincent mila omen sotta el so comand, quèll del Vèscov de
Pavia, di duu fradèi Landolfi, vun prevost de S. Ambroeus e l’alter
de San Nazzar e de Albèrt cont de Briandate, parten poeu tucc per
l’Asia, a la liberazion dei Luoghi Sacri. On ann dopo, in ona battaglia
contra i saraceni, l’esercit lombard, tradii da Alessio Comueno, Imperator
de Costantinopoli, el ven quasi distrutt e el noster Arcivèscov
el ghe lassa là pell e l’e anmò staa assee s’hann poduu dagh
dègna sepoltura in del monasteri de S. Nicolao in Costantinopoli.
Arcivèscov de Milan ven consacraa on cèrto Grossolano, già
vicari de l’Arcivèscov Anselmo, ma el dura pocch. In del 1105 prete
Liprando l’accusa l’Arcivèscov Grossòlan de delitt de simonia
e el domanda la proeuva de passà in mèzz ai fiamm, perchè
i giudes gh’abbien de vèss persuas che l’accusa fada a l’Arcivèscov
l’era vera e la proeuva la ven accordada. Fann su ona catasta de
lègn su la piazza de S. Ambroeus, longa des brazza e larga quatter,
lassandegh però in mèzz ona specie de busa dove podèss
stagh denter in pee on omm. El Liprando vèstii de pret e tranquill
‘mè on papa, el va in la busa, mèttend foeura ‘el coo e cantarelland
“Deus, in nomine tuo salvum me fac...”. Ghe ven daa el foeugh che’l dura
per on poo de minut e quand tuce creden che’l sia brostolii se’l veden
a vegni foeura tranquill e sorrident senza nanca ona scottatura.. come
el fuss staa al bagn. El Papa Pasquale II° cont el consilli Lateranense,
per quanto abbien dichiaraa che la proeuva l’era minga assee, el Grossolano
l’ha poeu dovuu lassà el vèscovaa e andà a pellegrinà
in Terra Santa. Tanti me domandarann in cosa el consist el delitt de simonia.
Ecco chi. Simone di Samaria, dètto il mago, el gh’aveva offèrt
a S. Peder di danee credend de podè comprà da lu la potenza
di miracol, per conseguenza a tucc qnèi che tentava de mercanteggià
in roba sacra ghe diseven simoniaci. Cosa la voeur di la superstizion!
L’ann dopo brusa, per la segonda volta, la gesa de S. Lorenz. Bisogna di,
per la veritàa, che i milanes, semper sott al giogo diria de la
schiavitù, appèna hann sentii el dolz de l’indipendenza...
“vattafarti!...” gh’è pù bon nissun de tegnij... e voeuren
vendicass! Tacchen sotta con Lod, el devasten; assalten Comm, el brusen;
la toeujen coi Paves e ghe dann la mastegada a Marcinago; vann contra Cremona
e fann presonee el Vèscov Albert. Ma a Lod, a Comm, a Pavia e a
Cremona, cova el foeugh sotta la sènner.. e ghe preparen a
Milan la soa tèrza e gran catastrofe. L’è inutil nascondel,
stavolta i milanes s’hinn creduu i padron del mond e s’hinn lassaa andà..
da la birra. Ma purtropp la pagarann cara e a faghela pagà ghe pensarà..
Federico Barbarossa. Sèmm in del 1112 e ven faa Arcivèscov
Giordano da Clivio. I milanes però andaven d’accord come... i tradizionai
cann d’orghen e succed lit e question d’inferno tra i partigian de l’Arcivèscov
Giordano e quèj de i’Arcivèscov Grossolano ch‚’l voeur sta
in carica a tucc i costi ma, come hoo già ditt, el dev lassà
a la fin l’arcivèscovaa. In del 1116 Giordano el ciama i milanes
a raccolta in piazza S. Ambroeus, el minaccia la chiusura di ges e la sospension
de tucc i Sacrament se ven minga dichiaraa guèrra a mort ai comasch.
Giordano el moeur in del 1120 e ven nominaa Arcivèscov el milanes
Olrico. Siccome S. Lorenz el voeur minga pèrd l’abitudin de brusà
ogni tant, in del 1124, causa on incendi a Porta Giovia che se estend fina
a Porta Cines, la gesa de S. Lorenz la brusa per la tèrza volta,
moeur l’Arcivèscov Olrico in del 1126 e ven nominaa Arcivèscov
Anselmo V° della Pusterla. L’ann adree i milanes, jutaa da la milizia
de Asti, Cremona, Piacenza, Parma, Mantova, Ferrara, Bologna, Modena, Vicenza,
e, come el fudess minga assee anca de quèlla de la Garfagnana, se
porten a l’assedi de Comm e, dopo avèll battuu tant da la part de
tèrra come da la part del lagh, se impadronissen de la cittaa e
la distruggen. E inscì, se Dio voeur, g’ha fin la guèrra
di des ann. Ma illudèmes minga per caritaa!... perchè dopo
on qnai ann de tregua ... se torna peg de prima e la proeuva ghe l’hemm
in del 1132, qnand i milanes batten i Paves e ne fann presonee on bordèll.
In del 1133, a Milan, gh’è.. ris e zoccor fra l’Arcivèscov
Ansèlmo che’l Papa l’aveva scomunicaa e i partigian del Papa Innocenzo
III°. Dopo avègh avuu tanti mort e minga pocch ferii, i discordi
finissen.. per la mort dell’Arcivèscov Anselmo. On ann dopo, i così
dètt Umiliati, che non eren alter che fraa Benedettin, fann su el
propi monasteri in del quartier de Brera del Guercio d’Algisio. Lor el
fann su ma, a so temp, Barbarossa ghe le trarà giò. Siccome
poeu l’invidia l’è mai morta, dis el provèrbi, i seguaci
de S. Bernard preghen i milanes de tirà su di palanch e rièssen
a fondà anca lor el so bravo monasteri nominaa: S. Maria di Chiaravalle
a quatter miètt foeura de Porta Romana. Intanta Roboaldo, vèscov
de Alba, el ven nominaa Arcivèscov de Milan. E tutt quèst
in del 1135. L’ann dopo l’Imperator Lotario de Germania, se capiss, el
ven in Italia, el se ferma a Mantova dove el raduna ona Dièta de
lombard che decid in favor di milanes in la controvèrsia che g’hann
coi cremones, ai quai, Lotari, el ghe fa l’obbligh de consegnà ai
milanes i presonee che tegneven, ma i cremones voeuren minga savèghen.
Allora Lotari je mètt al bando dichiarandegh guèrra. In del
1137 i milanes ghe la fann di ai cremones e fann presonee el so vèscov
Uberti che, coraggiosament, el se batteva come on moschettier. In del 1141
ven riedificaa la gesa de S. Peder in Sala e duu ann dopo i fraa erigen
el campanin che gh’è a destra de la basilica de S. Ambroeus. In
del 1145 se incomencia a fabbricà l’Ospedai del Broglio. Al vintitrii
de Dicember moeur l’Arcivèscov Romualdo e al vintitrii de Gennar,
de l’ann dopo, ven elètt Arcivèscov, Obe-to da Pirovano.
In on document che porta la data del vintun Marz 1147, ven citaa, per la
prima volta, el corp di “veggion” de la collegiada de S. Giorg al Palazz.
Fraa Daniele, Umiliato de Brera, el porta da Palermo la industria de la
seda e l’è la prima volta che la ven introdotta in Lombardia, cioè
in del 1148. Sèmm in del 1153, e domà tirà man quèlla
data me ven la pèll d’oca. Gh’è chi el Barbarossa. Me pias
però a vèss giust. Siccome l’hemm quasi vorruu nun, inscì
l’è propi el caso de di: “Chi voeur, nient ghe doeur”. I milanes
ghe n’aveven faa tropp ai comasch, ai paves, ai cremones e specialment
ai lodesan, l’era quindi ona roba umana che quèsti avèssen
de vendicass a la prima occasion. Capissi che la miglior vendètta
l’è el perdon, almen inscì disen, ma i lodesan, specialment
da quèll’orèggia li ghe senten minga, tant è vera
che duu de lor vann in de l’Imperator de Germania, Federico Barbarossa,
a domandagh giustizia. L’è quèll che cerca l’orb de vedègh!...
Barbarossa, che l’è on omm energich e d’ona ambizion che passa i
limit, ghe par nanca vera. El comencia a mandà a Milan on cèrto
Sicherio intimand ai milanes de dagh on tai de tormentà i lodesan.
Ma ai milanes, la forma on poo arrogante, la ghe fa andà la moscà
al nas, ciappen el decrèt e ghe’l strascen su la faccia al Sicherio.
El Barbarossa, fiol d’ona pipa, n’ha vorsuu pù e, senza mètt
temp in mèzz, el passa le Alpi, e el ven a incomencià l’interminabil
guèrra lombarda e tucc sann che’l Barbarossa n’ha faa... pussee
de quèll che’l podeva fann. La prima guèrra la g’ha prencipi
in del 1155 e strada facendo, tant per non pèrd temp, el Barbarossa
el comencia a distrug Tortona, colpevol domà de vèss alleada
coi miianes. El ven intorna a Milan e le fulmina cont di gran decrètt.
E fina lì l’era minga on gran mal; ma vist però che l’era
come parlà arabo, el devasta tutt el territori in gir a Milan, e
la cittaa la mètt in staat d’assedi. Milan, però, el ten
dur. I milanes scaven ona gran foppa intorna a tutta la cittaa, che l’è
poeu quella che incoeu ghe corr denter l’acqua del navilli. In quèlla
hann faa i so bravi pressidi che ciamaven i terragg che quaivun gh’è
ancamò, preparandes a difend Milan. Ma per dur che tègnen,
per la carestia e i bon paroll del cont Guido de Briandate, i milanes hinn
costrètt a lassà giò el sacch e arrendes. Se firma
la paas in del Settember del 1158, ma Milan el rèsta soggètt
al Barbarossa. Credarii minga che abbien faa paas su’l seri, èh!...
Ma che! Vun el fing pussee de l’alter. Se fann, l’è vera di gran
mojnn, di gran gentilèzz, di gran dimostrazion d’amicizia, ma tutt
è fals pussee che Giuda. L’odi che bujva de denter, el s’cioppa
quand el Barbarossa el voeur umilià Milan imponendegh on so rappresentant,
ma i milanes el voeuren minga assolutament. Anca quèsta, Federico,
se le liga al dit e ghe le fa purgà con on altra guèrra che
la dura duu ann. El comencia a assaltà Crema perchè anca
lee, come Tortona, la ten per i milanes. Però a Carcano, el scior
Barbarossa, l’è sconfitt dai miianes e dai brescian. Vist inscì,
el Barbarossa el se ritira a Pavia preparandes a vendicass di miianes,
quantunque ghe n’avèss già faa provà on poo de tutt
i sort. In del 1161, dopo avè distrutt tutt i campagn, el se ritira
momentaneament a Lod ma siccome l’inverno l’è on poo de maladètt,
el Barbarossa l’è obbiigaa a sta quasi coi man in man. Bisogna ben
che anca lu el cerca la mnera de passà el temp e le troeua tormentand
i presonee e cioè asendegh cavà i oeucc a Arnoifo, a Ubertino
da Melgate, a Waderico Verto, a Giordano Crivello e a Lanzecurto da Roncate.
A Lugone da Ogeno el se limita a fagh cavà on oeucc sol, ma in compens
el ghe fa tajà el nas, e a sto pover disgraziaa ghe, ven affidaa
i àlter cinqu de menà a Milan. In d’on dì sol el fa
taja via vinticinqu man che hinn quèi de gènt de coeur che,
impietosii da la famm che pativen i milanes, cercaven de mandagh giò
de la roba per non lassai morì. Milan l’è a la disperazion
e i milanes piangen come forsi hann mai piangiuu, vedendes costrètt
a la resa. El primm Marz 1162 i Consol milanes: Ottone Visconti, Arrivabene
da Porta Romana, Anselmo da Mandello, Gotifredo Mainero, Arderico Cassina,
Anselmo Dell’Orto, Aliprando Giudice e Arderico da Bonate, vann a Lod e,
cont i spad al coll, in atto de servitù, se presenten a Barbarossa
e fann att de sottomission a nomm de la Repubblica. Federico l’è
gongolant. L’obbliga i milanes a consegnagh i ciav de Milan, el Carroccio
i bander e tutt i insègn consolar. La cerimonia, commovent e imponent
in l’istèss temp la ghe pias molto al Barbarossa che per avvilì
de pù i milanes, l’ordina che la sia ripetuda. Anca el bis l’ha
voruu... stoo animal cont su ‘l zuccher!... E l’è el colmo. Dopo
el bis, Barbarossa, el se ten in ostaggio quattercent cittadin e l’ordina
la demolizion de tutt i oper de fortificazion e la consegna de tutt i castèi
in potere di milanes. El desdott Marz, l’Arcivèscov Oberto, l’arcipret
Milone, Galdino arcidiacon e Algisio cimiliarca de la metropolitana, avend
sentii quèll che gh’è adree a capitagh in sui spall a stoo
pover Milan, creden ben de mèttes al sicur dandeghen ona fètta
e a la sordina vann a Genova e da Genova in Francia, in compagnia del Papa
Alessandro III°. El desnoeuv Marz, i milanes riceven l’ordin de Barbarossa
de sgombrà Milan. Ubbedissen e se spanteghen in di quatter borgh
de Nosedo, Vigentin, Carraria e S. Peder a la Vepra, distant on para de
mia de Milan. A governai ven nominaa da Federico: Pietro da Curien, Marguardo
di Venibach e el cont Grumbach. El vintises Marz Federico l’ordina ai lombard,
quèi che gh’era rèstaa alleaa, la distruzion de Milan...
e scusee se l’è pocch. A ogni confederaa ghe ven assegnaa la distruzion
d’on rion, tirandel però su a sort, nè pù nè
men.. d’ona pèsca real, dove nissun pesca ben e tucc peschen mal.
E inscì ai lodesan ghe tocca la distruzion de Porta Renza, ai cremones
la Romana, ai paves la Ticines, ai novares la Vercellina, ai comasch la
Comasina e ai abitant de Seprio e de la Martesana, Porta Noeuva. La cinta
la ven quasi rispèttada, come i sèdes colonn de S. Lorenz;
i monasteri e tutt quèll che gh’è de sacro, men i torr e
i campanin. E intanta che la cittaa la ven sterminada, Barbarossa, el primm
d’April, l’è tranquillament in gesa de S. Ambroeus, ingenogiaa davanti
a l’altar maggior a ricev.. el ramoscèll d’olivo. E chì me
domandi se se pò vèss pussee... animal d’inscì. In
del Settember del 1164 el Barbarossa el torna in Germania. Intanta in del
‘65 ven faa la gesa de S. Bartolomeo. In del ‘66 moeur l’Arcivèscov
Oberto I° da Pirovano e dal Papa Alessandro III° ven consacraa
Arcivèscov de Milan el Cardinail Galdino. Sèmm in del 1167.
I pover milanes, spantegaa on poo de per tutt, senza cà nè
tècc, dopo la distruzion de Milan, rièssen a riuniss e a
giurà mort al Barbarossa, i minister del qual, vann adree a seguità
a perseguitai. La sort di milanes la moeuv a compassion i cittaa chi adree
e ona quai voenna anca de qnèi che hann ajutaa a distrug Milan,
e stabilissen de jutà i milanes. Se forma ona specie d’intesa. I
delegaa de Milan cont quèi de Cremona, Brescia, Bergom, Mantova
e Ferrara se riunissen in l’antich monasteri de Pontida e giuren de ridagh
ai milanes la patria desolada e de faghela finì al Barbarossa. La
noeuva alleanza la ciappa el nomm de Lega Lombarda. I bergamasch, i brescian
e i cremones hinn i primm a mandagh ajutt ai milanes che, incoraggiaa,
rientren in Milan.. E per la veritaa devom di che i noster alleaa abbandonen
minga i milanes fina che quèsti poden vèss sicur in cà
soa. Milan la ven fortificada de noeuv, ven rifaa el fossaa, ven ricostruii
i bastion e assicuraa i port. I milanes cerchen e fann de tutt per podè
tirà da la soa anca i lodesan, mèttend de part tutt i odi,
ma i lodesan hinn pussee dur del mur e se refuden. Allora i miianes trann
insèmma on esèrcit cont el concors di alleaa de Bergom, Mantova,
Brescia e Cremona e assedien Lod. I lodesan tegnen dur ma dopo des di ghe
tocca ced, inscì hinn staa costrètt a fa per forza quèll.
che hann minga vorruu fa per amor. I alleaa bergamasch e i alter, se porten
sotta al castèll de Trèzz, difes dal tedesch Ruino, e fann
presonee tutt el presidi. In Settember quèll bon Barbàrossa,
ei ven a Pavia e in la gesa de S. Peder l’è incoronaa de l’antipapa
Pasquale. La pèste de la marèma la fa strage in l’esèrcit
dei Barbarossa e ghe lassen la pèll anca: Ruinaldo, minister e favorito
de l’Imperatòr, e el storich Acerbo Morena. L’è on poo de
giustizia di Dio che incomencia. Ei vintun de Settember Barbarossa el raduna
on parlament a Pavia e ven decis de mètt al bando de l’Impero tucc
i cittaa ribèlli ad eccezion però de Lod e Cremona. Cinqu
dì dopo el Barbarossa cont el so esèrcit, al qual ghe s’era
unii paves, vercelles, novares e anca el cont de Briandate, spergiuro e
traditor de la patria, l’entra in Milan portand el vandalismo e la desolazion
e fasend man bassa su tutt el bèll e ‘l bon.. per compens.
Ma i milanes hinn pront a la riscossa e costringen el nemis, a ritirass.
In del Dicember i cittadin de Venezia, Verona, Padova, Vicenza, Treviso,
Ferrara, Brescia, Bergom, Milan, Lod, Piacenza, Parma, Modena e Bologna
tegnen on gran congrèss, ma minga de quèi che lassen el temp
che troeuven, e fann on giurament de alleanza offensiva e difensiva contra
qualsiasi nemis. Al congrèss ciappa viva part anca ona donna, Sofia
di Colfosco, sposà a Guercello Da Camino, detta Maria Trevigiana,
ona donna d’anim elevaa e de coragg, tant è vera che la concorr
cont tutta la gent che la g’ha a la soa dipendenza. In del Marz del 1168,
senza di nè crèppa nè s’cioppa, Barbarossa, per la
via de la Savoia, el fila a gamba levada in Germania. I milanes regordandes
che, fidass l’è on ben ma a fidass no l’è mèi, per
paura d’ona quai sorpresa del Barbarossa, capace de quèst e alter,
pensen de garantiss e garantì anca Tortona dai continov scorrerij
di paves e deciden de costruì ona cittaa su la sponda destra del
Tanaro, la fortifichen a quèll biondo, fasendegh intorna ona gran
fossa. A la noeuva cittaa i milanes ghe dann el nomm de Alessandria, in
onor del Papa Alessandro, tèrz, promotor e capp della Lega Lombarda.
Siccome per la prèssa de fabbricala, i tècc i hann faa de
paja, Barbarossa, tant per fa del spirit, ma cont la bava a la bocca, la
ciamava Alessandria de la Paja. I abitant, ch’eren quasi tucc profugh milanes,
s’hinn costituii in repubblica sotta la protezion del Papa. I donn milanes
in del 1169 venden tucc i so gioèj per podè ricostruì
in part la gesa de S. Maria Maggior, rovinada dal campanin intanta che’l
boriava giò, durant la distruzion ordinada dal Barbarossa. In del
1172 anca i Paves, che eren molto contrari, se deciden a entrà in
la Lega Lombarda e i so consol presten giurament. Intanta i milanes stann
minga coi man su’l consolaa, rifabbrichen in prèja i port de la
cittaa che hinn vott e cioè: Ticinese, Vercellina, Giovia, Comasina,
Nuova, Argentea, per la strada che portava a Argentolium, che l’è
el nomm antigh che’l gh’aveva el paes de Gorgonzoeula, Tosa e Romana. La
cittaa l’è divisa in tredes pustèrla: Fabbrica, S. Ambreus,
Azze, S. March, Noeuva, Monfort, S. Eufemia, Chiusa, Giovia, Tosa, Borgh
Noeuv, S. Steven e Bottonuu. Federico però l’è viv ancamò
e pussee rabbios de prima. Smanios semper de pescà in del torbid,
sollecitaa dal marches del Monferraa e dai paves, quantunque strètt
alla Lega, el torna a vegnì in Italia cont on esèrcit formidabil.
Dopo ave incendiaa Susa, minacciaa Turin e ciappaa Asti, el streng d’assedi
Alessandria. I paves se toeujen la maschera e se unissen ai todesch. El
vundes de Marz del 1175 i milanes cont el Carroccio se porten a soccorr
Alessandria. La roba la ghe va a orèggia al Barbarossa el qual el
va incontra ai milanes che eren già su’l paves, se ven a patti tra
Filippo, Arcivèscov de Colonia, Guglielmo da Piozasca e on S. Nazzar
de part de l’Imperator e Girardo Pisto milanes, Alberto Gambara brescian
e Gezzone da Verona per la Lega; patti che però l’imperator Barbarossa
el se guarda ben de rispèttà. E intanta moeur S. Galdino
Arcivèscov e al so post ven consacraa Algisio da Pirovano. Al vintinoeuv
de Magg del 1176, Barbarossa, rinforzaa l’e-sèrcit cont de la milizia
veguuda da la Germania, el tenta de uniss ai paves e de portass a Milan.
I milanes vègnen a savèll e volend ad ogni costo impedigh
l’union, ghe vann incontra e i duu esèrcit se troeuven in d’ona
pianura tra l’Olona e el Tesin e ingaggen battaglia. A la tèsta
de la milizia gh’era el Carroccio e cioè on carr che’l vègneva
tiraa di boeu, cont in scima ona specie de globo doraa tra dò bander
bianch. Mancava minga l’altar per di la soa brava. mèssa e on gran
crocefiss. El Carroccio l’era guardaa dai soldaa pussee bon e de fidegh
san, perchè se ‘l Carroccio el fudèss andaa in man ai nemis
l’era ona disgrazia peg de la mort. Sui primm i milanes eren molto dubbios
dè la vittoria, ma quand hann vist trè colomb a volà
intorna al Carroccio e poeu posass su’l gran crocefiss, s’hinn sentii a
slargà el coeur a la speranza perchè quij trè bèstioeul
non podeven vèss che de bon auguri. Se voeur che’l pret Leone, i
abbia veduu lu i trè colomb bianch a spiccà el vol da l’altar
de Sant Sisinio, Martirio e Alessandro dove i corp di trii sant eren staa
portaa da la vall de Non, taccaa a Trento, da S. Simplician e mèttuu
in la gesa battèzzada poeu cont el so nomm e che se pò vedèlla
anmò incoeu a metaa cors Garibaldi. Essend el vintinoeuv Magg la
fèsta del pret Leon e quèll de vedè i trè colomb
bianch a volà a Legnan e fermass propi su’l crocefiss del Carroccio
in quèll di l’era pù possibil dubità de la protezion
del Signor e la vittoria la podeva minga mancà. L’è vera
o no? La battaglia l’è stada terribii, i milanes incomèncien
a retroced e g’hann paura de pèrd el Carroccio, quand se fa avanti
la Compagnia de la mort, composta de 900 giovinotti decis a tutt. Pieghen
on genoeucc in tèrra e se consacren a Dio e a la Patria e dopo,
cont ona furia de no dì, se scaraventen contra al nemis come leon
e fann strage. La battaglia de Legnan l’è vera e propria gloria
di milanes. Stravacchen de cavall Barbarossa che’l pèrd scud e lancia
e i bander finissen in man di milanes. La Compagnia de la mort l’era capitanada
da Alberto da Giussano, soo minga se’l ciamaven da Giussano perchè
l’era nassuu a Giussan o perchè quèll el fuss el nomm de
la soa famiglia, ma quèll che podi assicuraff, però, che
lu l’ha decis de la gran vittoria e l’ha salvaa el Carroccio; per la soa
forza e per la soa alta statura ghe diseven el Gigant. Federico l’è
ritegnuu per mort, ma inveci errante e misero per i bosch el rièss,
dopo on poo de dì, a comparì a Pavia. E finalment al primm
d’Agost del 1177, in Venezia, città neutral, Federico el giura ona
tregua de ses ann ai rappresentant de la Lega Lombarda. Barbarossa cont
l’avanz del so esèrcit el rientra in Germania in del 1179 l’ann
che Milan l’edifica el Brolètt noeuv, li dove gh’era el palazz del
Comun del qual faseva part la loggia degli Osii e cont l’andà del
temp, battèzzaa Piazza Mercant. Ei Brolètt vègg, inveci,
l’era lì dove incoeu gh’è el Palazz Real col brolo che’l
faseva part de l’Arcivescovaa e el comprendeva S. Vittorèll, S.
Nazzar, Bottonuu, contrada Larga, contrada del Broglio, S. Steven e S.
Nazzar in Broglio, allora foeura de la cinta. In de l’istèss ann
s’è scavaa la Vettabbia e el navilii grand. Spiraa el termin di
ses ann de tregua stabilii cont la Lega e cioè in del 1183, Barbarossa
l’invida i rappresentant de la Lega Lombarda a on congrèss in la
cittaa de Costanza e là, se Dio voeur, ven definitivament conclus
la paas e riconossuu solennement la repubblica milanese. Meno male! Dopo
on ann, torna a Milan el Barbarossa, el sta chi on mesètt. E in
del 1185, tra i rappresentant de Milan e lu, se stipola on trattaa de alleanza
e ai milanes ghe ven concèss on bordèll de privileg. Moeur
l'Arcivèscov Adalgisio e ven faa Arcivèscov Uberto Crivelli
destinaa poeu a vèss faa Papa cont el nomm de Urbano III°. Torna
a fa on'altra passeggiadina a Milan Federico I° e l'è ospite
fin del monaster de S. Ambroeus e la Zècca, per fagh onor, la batt
moneda d'argent de trè qualitaa. Dò, porten la iscrizion:
"Fiedricus" davanti e "Mediolanum" dedree, e l'altra, davanti "Augustus"
e dedree "Mediolanum". El vintisètt Gennar 1186 se sposa a S. Ambroeus,
Enrico, fioeu de Federico cont Costanza de Sicilia, tosa del Re Guglielmo
e col sposalizi gh'è anca l'incoronazion de Enrico e Filippo. Ven
nominaa, semper da l'Imperator, Uberto Visconti, piacentin, Podestà
de Milan. Ai milanes, però, el ghe và pocch, ma manden giò
amar per spuvà dolz. Stii podestà forestee eren veri dittator
e faseven lor el bèll e el brutt temp e i milanes, che i hann vorsuu,
eren saltaa da la padèlla in la brasa. Amizone Carentano el fa scavà
el canal de la Muzza, Aldrado da Trezzeno el pensa ben de brusà
i eretich e Beno dei Gozzadini el fa vègnì l'acqua del Tesin
in la foppa chè gira attorna a Milan. Beno l'è i'ultim de
stii podestà che g'ha ona potenza propria ma i milanes ghe l'hann
cont lu a mort, tant è vera che'l furor popolar el ghe dà
sepoltura propi in quèll navilli che per Milan l'è poeu staa
fonte d'agiatèzza. E tutt per cosa? Per dò robb. Prima perchè
come president de l'Uffizi di Gabèll, espèrt come l'era in
affari de finanza, vist i condizion miserabil del Comun, l'ha applicaa
i tass che'l credeva ben de mètt senza riguard per nissun, ricordand,
da integerrim magistraa, che la legge la doveva vèss egual per tucc,
e poeu perchè s'eren mèttuu in tèsta che l'acqua che'l
faseva vègnì a Milan la portava di malatij contagios. L'hann
faa negà el cinqu Dicember del 1257, propi l'ann che l'hann faa
podestà e che l'era adree a sistemà el Tesinèll, che
l'è poeu el navilli de Biagrass. Pover Beno dei Gozzadini, ona fin
inscì se le meritava propi no! In del 1190 Federico Barbarossa,
in Palestina, combattend contra i Greci e i Turch, el moeur per avè
vorsuu fa on bagn, sudaa come l'era, in del fiumm Cidno e i cittaa italian
ristabilissen, come ghe par la soa libertaa e la soa indipendenza. Chii
l'è che credaria che'l Barbarossa, che domà a nominali el
faseva vegnì la pèll d'oca, el fudèss on poèta
e la proeuva ghe l'avii in sto madrigal in lode ai nazion ripàraa
a l'ombra de la bandera imperial:
E la donna Catalana, L'onorar del Genovese E la corte Castigliana, il cantar Provincialese E la danza Trivigiana Ed il corpo Arragonese E la perla Iuliana, Mano e cera dell'inglese E il donzello di Toscana. ma al quindes de Giugn el moeur e Filippo da Lampugnano el va al so post. Malgrado el bando Enrico el ven a Milan fasend mostra de regordass pù de nagotta e coi bèi e coi bonn el ghe fa rèstituì i presonee ai cremones e la guèrra cont Cremona la g'ha fin. |
|
tel.02 9837517 Melegnano Via Castellini, 27 |