Computers
Associazioni
| Computers |
|
melegnano.net | |
Melegnano.net
Associazioni |
 |
|
 |
| Intanta che Francesco Sforza el moriva, quèlla bondanza de quèll so fioeu el se trovava in Francia, sotta la bandera de quèll Re là. Soa mader, Bianca Maria, verament dègna miee de so marì, la ciama subit el fioeu da la Francia, la conferma come primm segretari de Staat Cicco Simonètta e l'ha minga tralassaa de spedì letter a tucc i ambasciator e a tucc i princip pregandi a vorrè continoà l'alleanza cont la casa Sforzesca. Galeazzo Maria el ven a Milan cont on so amis, el valoros Jacopo Triulz. Chì, l'è riconossun Duca per disgrazia di pover milanes che, d'on bèll generin simil podeven anca fann a men e che in del 1468 el sposa poeu Bona de Savoja. Galeazz Maria Sforza, Duca de Milan, el saria staa, come se dis, mèi pèrdel che trovall. Del so bèll caratterin ghe n'hemm subit on esempi in di so bèi maltrattament vèrs la mader la qual, vist che cont quèlla pèrla de fioeu l'era impossibil fa la vita, la voeur ritirass in la soa Cremona, ma in viagg, quèlla povera e bona principessa, la moeur a Melegnan. E anca quèlla mort lì la par minga tropp natural e se fa strada el sospètt che’l fioeu l'abbia avvelenada... e d'on simil fioeu gh'era de aspèttass quèst e alter. A nun milanes me rèsta ancamò, per memoria de quèlla brava e bona sciora, la gesa de l'Incoronada a Porta Garibaldi allora Porta Comasina. L'è talment sfrenada l'ambizion de Galeazz Maria che per vèghen on'idea basta dì el viagg che l'ha faa cont soa miee in del 1471 a Firenze. El corteo l'era compost d'on numer infinii de feudatari, consiglier, paggi, stipendiari tucc vèstii d'or e d'argent, de staffier, soldaa a pee e a cavall. Gh'era poeu musicant, strion e via discorrend. Insomma on tal seguit che nanca el primm monarca d'Europa el podeva immaginann vun compagn! E chii pagava? Pantalon! Stii pover milanes eren spremuu come i tegasc sotta al torc. Galeazz Maria el gh'aveva in l'anima de riconquistà tucc i cittaa che'l possedeva el primm Duca de Milan e podè mètt poeu in coo la corona d'Italia. Cattiv nel ver sens de la pàrola, lu el s'è faa odià de tucc compres i parent. Ne vorrii i proeuv de la soa gran cattiveria? Eccoi chi: per gelosia d'ona tosa, el g'ha faa tajà i man a Pietro Castello; l'ha faa inciodà viv Pietro Drago e poeu seppèllì in la scuderia ducal; a on so barbee el g'ha faa dà quatter gir de corda pretendend che'l continuass a fagh la barba; on pover paisan che l'aveva mazzaa ona legora, l'ha obbligaa a mangialla cont la pèll e tutt, fina che stoo pover diavol l'è crèpàa. Parlèmm poeu minga de la libidin perche' el saria on castigh di Dio. Insomma, quand s'è ditt che l'è staa on omm brutal e feroce pussee d'ona bèlva s'è ditt tutt. Inveci di vègg consiglier, lu el se fidava di giovin che per bontaa e per vizi faseven el para cont lu. A quèi che ghe andava a genio el ghe dava el toeu e poeu toeu, ma per quèi che'l gh'aveva minga su'l birla, l'era sgregia. Amante di fèst, ne dava de spèss e pantalon el pagava. N'ha daa voeuna straordinaria quand l'ha vorruu fa riconoss el so fiolin de trii ann. Gian Galeazzo Maria, al qual, per minga pèrd temp, el gh'aveva già destinaa per miee Isabèlla, soa cusina e tosa de l'erede del regno de Napoli, che sì o no la cuntava on ann. On astrologh, interrogaa dal Duca, el gh'aveva predètt che’l saria mort dopo vundes aun. Ah, sì!... el g'ha rispost, ben mi te assicuri che la tòa vita la durarà minga pussee de trii dì e l'ha faa crèppà in mèzz a atroci torment e de famm. A Milan podeven pù soffrill! Trii nobil Milanes, el Lampugnani, l'Olgiati e Carlo Visconti, che l'odiaven a mort, giuren, davanti a la statoa de S. Ambroeus, de toeugh la vita al tiranno e liberà Milan e ghe rièssen el vintises Dicember 1476. Galeazz, dominaa da cèrti presentiment, per paura el s'era circondaa dai parent e dopo ave' basaa i fioeu el decid de sentì la mèssa in la soa cappèlla. Ma siccome el so cappellan in quèll moment el gh’era minga, l'hann indott andà in gesa de S. Steven dove el ven subit massàcraa senza misericordia. I congiuraa, Lampugnan e Viscont, hinn staa sbranaa in la stèssa gesa, l'Olgiati l'è spiraa fra i tenaj rovent e Nicola Capponi detto il Montano, che l'aveva tramaa la congiura, l'ha fenii su la forca a Firenze. |
|
tel.02 9837517 Melegnano Via Castellini, 27 |