Computers
Associazioni
| Computers |
|
melegnano.net | |
Melegnano.net
Associazioni |
 |
|
 |
| Incominciaroo a diff che sto noster Milan, di milion de ann fa, l'era nientemen che fond de mar. Cosa?!... Fond de mar?... - Propi. E chii le dis son minga mi, ma la geologia. Allora el bon Dio l'aveva nancamò de creà l'Adamm e per conseguenza, salvo ona quai bèstia, al mond non gh'era anima viva e forsi i robb andaven pussee mèi de adèss. Donca, quèll mar che incoeu fann del tutt per vedè de fall vegnì a Milan el gh'era già la bellezza de milion de ann fa, soltant che Milan inveci de vèss port de mar non l'era che'l fond e on fond abbastanza... fond se i ond, semper stand a la geologia, andaven a sbatt contra i scimm pussee alt de le Alpi. Se dis anca, e mi g'hoo nissuna difficoltaa a credel, che da fond de mar che se rispètta, el gh'avèss anca on banch de corall dai des ai vint meter de spessor. Comm l'era fond de mar anca lu come Milan e gran part de la Lombardia. A pocch a pocch el mar el se ritira e in seguit, a soo no qual cataclisma, s'è formaa duu giazzee grandissim: quèll de l'Adda e quèll del Tesin. Quèll de l'Adda el vegneva giò fina a Monza e quèll del Tesin fina a Gallaraa. La Lombardia l'era donca ona specie de Polo Nord. Quand poeu el mar el se sia decis de... ritirass del tutt in di so appartament l'è on poo difficil savell cont precision perchè, per quanti calcol abbien faa, de sicur se sa nagotta. Chii dis in d'on period de vint milion d'ann e chii dis cent milion! Ai giazz ghe devom tanto perchè, avend sbarraa i vall, l'ha formaa i lagh. Ma anca el giazzee l'era destinaa a sparì e difatti el s'è squajaa per i gran piovud e per la nev che dislenguava e l'acqua che vegneva giò se poeu formaa el Tesin e l'Adda. A ricordo del mar mè rèstaa ona gran mèlma e la nèbbia la qual la mè tanto affezionada ancamò incoeu. Milan, donca, dopo vèss staa fond de mar, poeu quasi on giazzee, l'è rèstaa ona marscida e l'è precisament de quand l'era ona marscida che cominci a cuntav su la storia. Intanta el bon Dio l'ha pensaa de creà l'omm e l'ha impastaa insèma l'Adamm e da ona soa costola l'ha poeu tiraa foeura l'Eva che l'è stada la causa de tucc i noster mal, per avè mangiaa quèll famoso pomm che'l Signor el gh'aveva proibii de mangià. Come Milan ei sia staa... creato e messo al mondo de precis el se sa no. Se dis che Ambigato, Re de la Gallica Celtica (Lionese), vist che la soa popolazion l'era troppa e per gionta l'andava adree a aumentà, l'ha pensaa ben de mandà i so duu nevod, Sigoreso e Belloveso, foeura di scato], cont on cèrto numer de popolazion. Ma dove mandai? Pensa e ripensa l'ha conclus cout el fagh ciappà, tant a vun che a l'alter, la direzion che gh'aveven i usèi E i usèi, senza savèll, hann menaa el Sigoreso su la riva destra del Danubi e el Belloveso in Italia, propi tra l'Adda e el Tesin, dove l'ha veduu la rocca de Medolano e là l'ha fabbricaa la soa brava cittaa o borgh, come vorrii vialter, ricoverand tutt i famili che'l gh'aveva adree. Donca, stand semper ai ciaccer che se dis, Milan el ghe dev la soa vita... ai usèi e la soa fed de nascita, se ve fa nagotta, la portaria la data dei 521 prima de Cristo. Gh'è però anca chii dis che l'è minga per la esuberanza de popolazion, che'l Beiloveso el sia vegnuu in Italia e nemmen el se sia lassaa guidà di usèi, ma la reson vera la saria perchè i Galli andaven d'accord comè i cann d'orghen e sarien vegnuu in Italia per cercass ona patria noeuva, come andà in cerca d'on appartament... quand se podeva. El Belloves el gh'avaria avuu adree 130 mila personn tra omen, donn e fioeu. Ma la veritaa, quèlla vera, la se sa no e la se savarà mai, perchè gh'è anca de quèi cbe voeuren sostegnì che i Galli sien vegnuu in Italia per ona vendètta d’on marì tradii, el che voeur di che i miee tradiven i so marì anca cincent ann prima che Cristo el vegnèss su la tèrra. Hinn però quasi tucc d'accord a sostegni che'l fondator el sia staa el Belloveso e che la cittaa l'abbia ciappaa el nomm di duu capitani Medo e Olano che, miss insèmma, sia saltaa foeura Mediolanum; ma gh'è anca chii dis che Milan l'abbien battezzada Mediolanum per ona bèstia trovada in d'on canton e cioè on porscèll, a dila in bon milanes, quattaa metaa dal so pel e metaa de lana. E quèst, se ve fa nagotta, l'è staa in del 622 prima de l'era volgare. Recentement, in d'ona riunion al Regio Istitutt de Scienze e Letter de Milan, el professor on. Solmi l'av aria smentii tutt, dimostrand che la parola Mediolanum non la saria alter che la forma latina della voce volgare: mezzano e i so derivati che g'ha daa el nomm a tanti localitaa. Stand a lu, insomma, el porscèll cont la mèzza lana e tutt el rèst, non la saria che ona panzanega... e mi per tajà curt foo passà el tradizional carr d'oli d'oliva e la panzanega l'è bèlla e finida. Se comencia però a savè che Milan l'è al mond domà la bellèzza de 221 ann prima de la venuta de Cristo. Sigura... l'alter dì. |
|
tel.02 9837517 Melegnano Via Castellini, 27 |