Computers
Associazioni
| Computers |
|
melegnano.net | |
Melegnano.net
Associazioni |
 |
|
 |
| In del 222 Marcello, consol roman, combattend Virdumanaro o Viridumaso, salvo error, el se impadroniss de Milan e de tucc i alter cittaa dell'Insubria fina ai Alp che i romani hann poeu ciamaa Gallia Cisalpina e anca Gallia Togata per la toga che portaven i abitant. In del 48, ma intendemes, 48 ann semper avanti Cristo, sotta Giulio Cesare dittator, Milan l'acquista la cittadinanza romana e l'è inscritta alla tribu Oufentina de Roma. In quèll'epoca, però, par che a Milan se mangiass de maladètt ma de maladètt assee, almen inscì l'ha ditt Giulio Cesare quand l'ha sènaa chi in cà de Valerio Leone. Se capiss che allora la busècca, el minestron coi codegh, l'oss bus, el rostin negaa, la cassoeula e el panatton se saveva nanca cosa fussen... se de no el se saria lèccaa i dit anca l'Imperator romano. L'è vera o no? 'Cinquantaduu ann, da la nascita de Cristo, fann vèscov S. Barnaba che l'è el primm vescov staa faa a Milan e l'è anca quèll che ha fondaa la gesa milanesa. In del 54 impera quèll'animal, nominandel come viv' de Nerone el qual, bon come'l pan, el manda chi Paolino, on sicari, a perseguità i cristian e i primm a lassagh la pèll hinn San Vitale e Santa Valeria. E adree a quèi ghe n'è andaa on bordèll che lassom in la pènna. A lu succed Anolino, on alter bon de fa broeud, che manda a mort San Nazzar e San Cels. Ghe n'era però... de la gran bona gent allora! In del 193 ven elètt Imperator roman Giuliano Didio, milanese puro sangue, e S. Mona, on alter milanes, che'l consacren vèscov de la Cattedral. I ann passen come Dio voeur e in del 255 se fonda la gesa de San Peder in Camminadèlla e trèdes ann dopo a Gallieno, Imperator roman, ghe ven in ment de assedià Milan, ma ‘l g'ha el fatt so perchè tanto a lu che al so fradèll Valerian e al so fioeu Salonino, senza tanti compliment ghe fann la pèll. Arrivom al 295 quand l'Imperator roman Massimiano Erculeo el ven a Milan e chi el stabiliss la sede per difend l'Italia dai barbari, sta povera Italia desiderada da tucc e da tucc maltrattada. Intanta a Milan ghe fann la soa brava cinta. La cittaa la comencia a respirà on poo in del 312 quand Costantino il Grande l'entra trionfalment in Milan che poeu la tocca, come se dis, l'apice del so splendor per vèss stada dichiarada capitai de l'italia settentrional. E l'è precisament dopo de st'epoca chi, che se sviluppa la prima gran personalitaa milanesa: l'Ambroeus. La decadenza evidentissima del prestigio imperial la ghe fa gioeugh a l'autoritaa religiosa che l'è adree a scappagh foeura de man de Roma ormai decrepita e consciada come San Quintin. L'Ambroeus el sta minga li a pensagh a sora dò volt, el se presenta in nomm de la nostra cittaa, de la moraiitaa e de la giustizia, e in faccia all'Imperator el se fa minga vedè debol, ma vun che ghe basta i so cinqu sold, e cont i bèi maner el se svincola de l'autoritaa del pontefice romano, dand inscì alla diocesi milanesa ona specie de costituzion, che disaria quasi indipendent. I divèrs framment del Tempio che porta el nomm del gran Vèscov, S. Vincenz in Prato e i Colonn de San Lorenz, che vèmm adree a pontellà per paura che on quai dì me vègnen in su'l coo, hinn i unich avanz che è rèstaa de quèll'epoca che se sbaglia minga a ciamà gloriosa, e, se gh'è rèstaa domà quèj, ghe'l devom a Attila, on alter bon de tirà su cont la moeuja, e a Uraja, on goto, peg de Attila... Ma de stii duu personagg chi ne discorarèmm a so temp. Adèss parlèmm de l'Ambroeus e disi semplicement Ambroeus perchè fina al principi del 374 non l'era che pretor imperiai e l'è staa faa vèscov propi nel stèss ann. Gh'è tanti milanes che creden, e voeuren anca sostegnill, che Sant Ambroeus l'era on bèll omm e ona pèzza d'omm, vicevèrsa podi assicurav che l'era piccol e brutt. Tanti voeuren anca che'l sia staa el primm vèscov de Milan e l'è ona cantonada che ciappen perchè el primm l'è staa S. Barnaba, el segond S. Anatalone e poeu adree a lu è vegnuu San Caio, San Castriziano, San Calimer, San Mona, San Mirocleto e poeu San Eustorg, San Protas Algisi, San Dionigi Marliani e dopo, finalment, Ambroeus el qual dopo vott ann da la soa elezion a vèscov, l'ha fondaa la basilica de San Nazzar, duu ann dopo la gesa de San Simplician e on ann dopo anmò quèlla in onor a San Gervas e San Protas. In del 387 S. Ambroeus el battèsima S. Agostin, el consacra solennement la basilica da lu prima ciamada Ambrosiana. Tanti gh'avarann la convinzion che l'Ambroeus el fuss milanes, ma nanca per sogn! Lu l'è nassuu in del 340, a Treviri nella Gallia, dove so pader, che l'era patrizio romano, l'era staa mandaa prefètt. L'Ambroeus però l'è staa levaa e educaa a studi severissim in Roma. In del 374 nominaa prefètt de l'Alta Italia, resident a Milan, dove tucc el stimaven e ghe vorreven ben per l'ingègn e la bontaa. Quand se doveva nominà on vèscov noeuv come per la mort del vèscov Ariano Aussenzio in del Dicember del 374, i milanes se radunaven in Piazza dove gh'era la basilica Intramurana, e che incoeu gh'è el Domm, per vedè se podeven mèttes d'accord cattolich e arian, ma l'era come rid e tanti volt se pèstaven su perchè chii vorreva on vèscov cattolich e chij le vorreva arian. On bèll dì in mèzz a vun di solit battaclan se mètt a parlà l'Ambroeus. El baccan el cèssa, la calma la torna e tucc ascolten la parola eloquent e convincent de l'Ambroeus, e eren tant persuas de quèll che'l diseva che on fiolètt el salta su a vosà:”Ebbene sii tu vescovo” e tuce s'hinn mèttuu a vosà: “Ambrogio Vescovo”. L'Ambroeus, che'l se specciava minga cert ona roba simil, meravigliaa el refuda. Vialter me vorrii vèscov, el ghe dis, e mi ve ringrazi, ma vialter savii no che mi sont nanca battezzaa! Tanto mèi, rispond la folla: I pret hinn in guèrra tra lor e ti che te fee part de nissuna sètta te see l'omm imparzial che va ben per nun. Te battezzarèmm nun al fonte, i sacerdoti te ordinarann pret (insci l'è staa al sètt Dicember del 374) e l'Imperator l'approvarà la nostra scèlta. Ecco come l'Ambroeus l'é sta faa véscov diventand poeu el vèscov pussee celebre de Milan. Lu l'ha combattuu i arian, l'ha fondaa ospizi, l'ha soccors i pover, el s'è impost a la prepotenza dei grandi compres l'Imperator Teodosio, el qual l'è staa da l'Ambroeus, in del 390, mèttuu foeura de gesa senza permèttegh de fa la Santa Comunion, causa la strage che Teodosio l’aveva ordinaa a Tessalonia, incoeu Salonicco, dopo avègh ditt tutt quèll che stava ben de digh, per tutt i so barbaritaa. In del 395 l'Ambroeus el g'ha ancamò de rimproveragh a Teodosio Imperator di alter barbaritaa, p'erchè el loff el pèrd el pel ma mai el vizi. Teodosio el se pentiss, el fa vott mes de penitenza e poeu el pensa ben de morì. El mal l'è che in del 397 moeur anca S. Ambroeus, piangiuu da tucc i miianes e piangiuu sincerament, Ma siccome, mort... on papa se ne fa on alter, inscì al so post va San Simplician Soresini, on miianes autentich. Ma siccome anca lu la faccia de scampà semper ghe l'aveva minga, el moeur lassandegh el post a S. Venerio Oldrati e quèst el succed in del 400. Dopo de lu è staa faa vèscov S. Marolo e via de seguit, San Martiniano Osio, San Clicerio Landiani e San Lazzaro Broccardi, tutti puro sangue milanes. |
|
tel.02 9837517 Melegnano Via Castellini, 27 |