Computers
Associazioni
| Computers |
|
melegnano.net | |
Melegnano.net
Associazioni |
 |
|
 |
| Mort Ottone, Matteo, che di sostanz e de la potenza che l'aveva ereditaa dal zio, ghe n'aveva minga assee, el pensa de fa sposà so fioeu Galeazz cont la sorèlla del merches d'Este, Beatrice, che, fra parentesi, l'era la vedova d'on nevod del famoso conte Ugolino, mort de famm nella muda de Pisa. Magnifica l'è stada l'entrada in Milan de Beatrice d'Este, sposa al Geleazz. Dusent giovinotti de la nobiltà, insèmma a tanti uomini d'armi e ai ambasciator di cittaa soggètt ai Viscont, ghe faseven scorta d'onor. Beatrice l'è entrada in Milan sotta on gran balducchin e sèttada su on cavall tutt quattaa de scarlatt, che allora l'era minga on color sovversiv. Intanta che la se avviava al palazz del Brolètt vègg, dove stava de cà Matteo, gh'era gioster e tornèi, per tegnilla su allegra. Parlèmm poeu no del disnà de spos! Bocca cosa te voeuret! I invidaa eren... domà mila e a ognidun gh'è staa regalaa on vestii e minga cèrt de lanètta nè de cotonina. Per vott dì l'è staa... ca Litta in Borgh, come se dis. E quèst el succedeva nel 1300. Matteo, forsi istigaa da Galeazz, el se dà a di guèrr inutil e rovinos nel territori de Novara e Pavia. Intanta a Cremona gh'era là in armi, aspettant el momentin bon de saltagh adoss ai Viscont, i Torriani Erecco, Martin e Guido. El moment tanto desideraa el ven, la sommossa la s'cioppa a Milan nel dì stèss che i Torrian vegnen a Lodi e a Matteo non ghe rèsta che fa quij bèi gambètt. El fila a Nogarola, su'l mantovan, e Galeazz, cont le miee e i fradei, el va a Ferrara e Guido Torriani el ven acclamaa dai milanes capitani del popol. Guido, che'l podeva corr a Nogarola e desfass del Matteo che l'era là senza soldaa e senza danee, se ne guarda ben, ma dopo quattr'ann el g'ha de pentiss e amarament de la soa lealtaa. Tutt stii robb ghe impedissen minga però a Francesco Petrarca de nass a Arèzzo in del 1304. In del 1310 ven in Italia el Re tedesch Enrico VII°, cont di ottim intenzion e cioè, quèll de mètt on poo de paas fra i cittaa visin, passandegh su ai Guelfi e ai Ghibellin. El progètt l'è bèll, ma el pussee l'è quèll de podè riussì a mèttel in pratica. Però tanti speraven in la riussida e, fra quèsti, Dante Alighieri che l'era vegnuu a Milan apposta da Firenze per saludà el Re. El Re Enrico, però, el gh'eveva on'altra mira. Siccome lu el gh'aveva avuu la corona argentea in Germania el vorreva vègh, a Milan, quèlla ferrea e a Roma quèlla aurea de l'Impero. De già che l'era adree... el cercava de vègh tucc i trè i coronn! El vorreva fa ona spesa sola insomma. Ai milanes, bisogna dì la veritaa, quèll Re tedesch lì, dopo tanto temp che ne vedeven pù, el ghe dà sui nèrv e speciaiment a Guido Della Torre che'l prusmava che'l vegnèss chi.. a rompegh i oeuv in del cavagnoeu. Matteo invece, che l'era on filon, el cerca de pelà la gaina senza falla crià, el ven a Milan appèna entraa Enrico el qual, pur savend de vèss on poo sui crost ai milanes, se ne impipa de l'Olanda, e in principi del 1311 el se fa incoronà, cont soa miee, in S. Ambroeus; Oltre che Enrico l'era vegnuu giò a mongiom, bisognava fagh anca on regall, perchè inscì se usava, e lu cèrt el vorreva minga rinunciagh e per paura che'l vegnèss minga... spontani, el manda al Consilii on so minister cont el so bravo nodar a domandagh cosa pensaven de regalagh. Ven stabilii on regall de cinquanta mila fiorin d'or e subit el nodar l'ha ciappaa nota. Sè sa... carta canta e villan dorme! Quèll margnifon de Matteo Visconti che a Re Enrico el vorreva andagh in la manega a tutt i costi, el dis che se podeva minga lassà senza on regall la Regina e siccome i danee hinn minga so, ma de l'eterno pantalon, el ghe fa dà des mila fiorin anca e leè. Guido Delle Torre, che'l bujva, el pò pù sta in la pèl e, cont on'aria de toeu in gir, el ghe dis a Matteo perchè l'ha minga propost de fa cifra tonda e daghen cent mila adrittura.El nodar el sent a dì cent mila, el marca cent e lassa che la vaga e ghe nanca staa pinco che sia staa bon de fagh cambià la cifra. Milan l'ha dovuu poeu pagà i cent mila fiorin d'or, vun dessora via de l'alter! La roba, come se podeva spèttasela, la fa nass on malumor d'inferno. I soldaa tedesch se mètten a saccheggià, i Della Torre; vegnen bandii per semper, me el mal l'è che el Re el comencia a fidass minga nanca di Viscont e je manda via anca lor, ma la soa lontananza l'è durada pocch. Bisogna tegnì present che Matteo Visconti, quantunque vègg, l'era fina andaa a Asti da Enrico VII° a dichiarass ghibellin riussend poeu a strappagh foeura di man el vicariaa de Milan per lu e quèll de Piacenza per so fioeu Galeazz, sbattend a mar inscì el pover Guido Torriani che l'ha dovuu scappà a Cremona dove l'è poeu mort de crèppacoeur. El modo de agì del scior Matteo Viscont l'è minga cèrt dègn de stima e se capiss propi no perchè gh'avèssen daa el soranomm de Magno. Ma anca per el scior Matteo ghe se prepara minga cèrt di dì de gioia. So fradell Marco, so cusin Lodrisio e Simone Crivello, ambizios pussèe del bisogn, me l'ingolfen denter in d'ona lotta pièna de pericol. Stracch, finalment, el se riduss in d'ona cèlla del convent de Crescenzagh e là el rend l'anima a Dio, minga prima però de avè istigaa i so quatter fioeu Marco, Stefano, Lucchino e Giovanni Arcivèscov, contra i avversari coi quai ghe l'aveva a mort. Quèst el succed in del 1322. Per stagh adree a Matteo in tucc i so bèi robb, sont andaa in oca de di che in del 1313 è nassuu a Paris Giovanni Boccaccio, fioeu d'on mercant fiorentin. Tutti, o pocch o tant, el conossom per avè leggiuu i so novèll... oppur per avèll sentii... in operètta che l'è però minga la stèssa roba. Sèmm semper in piena guèrra. Galeazz, a mal partii, l'invoca l'ajutt de Lodovico il Bavero e l'otten podend inscì tegnì dur e batt i soldaa del Papa che assediaven Milàn, i quai alla fin, hann dovuu ritirass a Monza, dove Galeazz je distrug. Dato poeu el bèll caratterin de Galeazz, se pò immaginà cosa ghe ne fa passà ai monsciasch. A dimostrà la soa gran bontaa d'anim basten i orribil preson che l'ha faa costruì in la torr de Monza, ciamaa el Forno. Ma el Signor l'è giust perchè Galeazz stèss, de quij preson, l'è staa costrètt a sentighen el savor. Lodovico el Bavero el ven a Milan e chi el se fa incoronà; intanta el fradèll de Galeazz. Marco, e so cusin, Lodrisio Visconti, ambizios de fa part del Governo, ghe mètten al Bavaro de cattiv oeucc Galeazz. Lodovico, senza tanti compliment, el fa mètt in del Forno de Monza Galeazz coi fioeu e duu fradèi. E quèst in del 1327. Castruccio Antelmelli, Signore di Lucca, l'interced per Galeazz, pregea da Marco, che'l s'era pentii de avèll faa mètt in del Forno, anca perchè a lu el gh'aveva portaa nissun vantagg e la libertaa la ghe ven concèssa. Appèna Galeazz el ved el sò, el se mètt sotta la bandera del so benefattor e el va a Pescia dove i disagi, i rimors e i dispiesè ghe procuren la mort a cinquantun ann in del 1328. Mort Galeazz se fa viv so fioeu Azzone che, ghe tegni subit a di, che l'era on bon princip nel vero sens de la parola. Conossuu el debol lu l'ha savuu tant a fa, on poo coi bèi maner e on poo coi palanch, a conquistass i simpatij de Lodovico che'l g'ha daa el vicariaa de Milan e de Monza. Ma in del 1330 el se dimètt de vicari imperial per quèll de Signore Generale de Milan e dopo el s'è vist, padron de Vercelli, Bergom, Cremona, Lod, Vigeven, Piacenza, Brescia e metaa Pavia. Intanta però l'erà andaa in rotta cont Lodovico per cèrti leg che a lu ghe andaven no. Azzone l'aveva introdott ona polizia e on ordin che fin allora se saveva nanca cosa eren. Lu l'è staa l'unich di Viscont che se dichiarass vero Sovrano e che'l battess moneda cont el so nomm. Ven poeu trovaa mort so zio Marco e se sa minga in che manera. Azzone el fa costruì ona noeuva cinta a la cittaa, el sposa Caterina, tosa del cont de Savoja, el se uniss ai alter princip per frenà l'ambizion de Giovanni de Boemia, el se impadroniss de divèrs cittaa tra i quai quèlla de Brèscia, che l'era stada tolta a Martino della Scala el qual a Azzone el manda contra Lodrisio Visconti cont i Scaligeri e ona quantitaa de avventurier e farabutt che minaccen Milan da la part de Parabiagh. Par che la vittoria la sorride e Lodrisio, ma tresent savojardi vègnen come el formagg sui maccaron a sconfig Lodrisio e compagnia bèlla, propi in del moment che staven fasend man bassa. Lucchino Visconti, che l'era cont Lodrisio, el ven faa presonee e ligaa a ona pianta de nos, e dopo de lu ven faa presonee Lodrisio e duu di so fioeu. Bisogna confessà che l'era tanto poca la speranza de veng, che la vittoria l’hann ciamada on miracol de S. Ambroeus, anzi gh'è staa chii sostegneva de avè vist el Sant che batteva i barbari e tal e tanta l'era sta convinzion che a quèll post hann fabbricaa ona gesa a lu dedicada. Azzone l'avaria poduu inciodai tucc quij car so parent che l'aveven tradii, ma lu, de anim bon e generos, el ghe dà a tucc la libertaa. Lodrisio sol, cagion de tutt el mal, el scunta per tanti ann el so delitt in d'ona torr del Castèll de S. Colomban. Azzone l'era la delizia di milanes e quand l'è mort, gioven, perchè se gh'è ona persona bona al mond la moeur prèst, tucc l'hann sincerament piangiuu. Mort a trentasètt ann, in del 1339, quand inveci per Milan gh'era bisogn che'l scampass almen cent! Durant el so breve regno l'ha faa tanti bèi robb come, per esempi, el pont de Lècch, l'arcada de S. Peder martir in S. Eustorg e la faa rifabbricà la soa residenza che non l'è alter che l'attual Palazz Real e i stanz i ha vorsuu pitturaa, par, da Giotto. Siccome Azzone el gh'aveva minga de fioeu, ven nominaa al so post i zij Giovann e Lucchin Visconti, duu bon anca lor de fa tossich, come se dis in bon milanes, ma specialment el second. |
|
tel.02 9837517 Melegnano Via Castellini, 27 |