Computers
Associazioni
| Computers |
|
melegnano.net | |
Melegnano.net
Associazioni |
 |
|
 |
| Intanta la povera Isabèlla la s'è ritirada a Napoli,
vist che'l so fioeu Francesch el pò minga, come ghe spèttava
de diritto, vègh la succession del Ducaa, tutt ben intes, perchè
Lodovico el gh'aveva mèttuu el sciampin. Lodovico, furb come l'era,
al Consilli dei maggiorenti l'ha faa mostra, el loder, de propon el so
nevodin Francesch come successor al Ducaa de Milan, ma el popul el g'ha
rispost che l'era stuff de seguità a vègh di Duca ancamò
de tètta e di reggenz e che’l vorreva un omm che savèss governà
come se doveva e per conseguenza ghe n'era minga vun che fuss staa mèi
de lu... e l'era quèll che'l cercava l'orb de vedègh!...
Lodovico, semper da quèll filon che l'era, el fing de fass pregà...
e l'ha finii ad accettà... propi perchè l'hann obbligaa.
Quanti negoziant de tolla gh’era però anca allora!... Intanta el
Re frances Carlo VIII°, che l'era staa spint dal Moro, el riva a Napoli,
ma vist la sua facil conquista, tutt i potentati d'Italia se spaventen
e Lodovico pussee de tucc e senza sta lì... tintora e menara, fann
una Lega per podè andà contra i frances. In sta Lega gh'è:
el Re de Spagna che, per chii le savèss no, l'era anca Signore de
l'Isola de Sicilia, l'Imperator e Lodovico, el qual el se mordeva i ung
per vèss staa lu stèss a tirass la zappa sui pee, tanto pù
che'l Duca d'Orleans, da Asti, el comenciava a spungel un poo a causa del
tradiment de divèrs cittadin che vedeven Lodovico come'l fumm in
di oeucc, e che gh'aveven già portaa via Novara. A Carlo VIII°,
che gh'era andaa a orèggia l'affari de la Lega combinada in l'April
del 1495, l'è tornaa pussee che a la svèlta in del so regno.
Bisogna però notà che Carlo VIII° el gh'aveva cont lu
un capitani de gran valor che l'era el Gian Giacom Triulz, milanes puro
sangue e nemis de maladètt de Lodovico el Moro. Col temp Lodovico
el torna a vègh Novara per un accord special faa tra lu e el Carlo
che, se voeurom vèss giust, l'era minga cèrt quèll
che ghe dava pussee de grattass in coo, anca perchè, pover diavol,
in del 1498, ghe ven on colp apopletich che le manda de la part de là
a vintisètt ann e l'è un poo dolorosa!... El Duca d'Orleans
el ciappa el post del Carlo cunt el nomm de Luigi XII° e col titol
de Re de Francia; e quèst chi, per el Lodovico, l'è un ossètt
un poo pussee dur de resignà del Carlo. A Asti ghe ven in ment al
Luis che in di vènn ghe scorr el sanga di Viscont perchè
l'era staa nevod de Valentina Visconti e allora el se cred in obbligh de
vèss, oltra che Re de Francia e Napoli, anca Duca de Milàn.'
Apriti cielo!... Ve l'immaginee el Moro?... Disaster pussee gross ghe podeva
minga cèrt capitagh, ma chii voeur, nient ghe doeur, dis el proverbi.
Intanta Luis XlI°, appèna el g'ha in coo la corona, el fa paas
cont el Re de Spagna e lega cont Venezia. Lodovico n'ha vorsuu pù
e disperaa de vègh minga l'appogg de l'Imperator che semper el ghe
promètteva ma mai el mantegneva, el s'è lassaa ciappà
da un tal spaghètt, al ponto de consiglià fina el Sultano
di Turch de dagh l'assalt ai Venezian inventand che ghe minacciaven anca
el so impero. Appèna che s’è vegnuu a savè sta roba,
vattafarti! Se incomincia a tra attorna la vos che Lodovico l'era el nemis
di cristian e podii immaginaff!... L'era già pocch in su'l birla
che l'è andaa giò del tutt. Lodovico, prima che vegnèss
i frances per la seconda volta in Italia, el gh'aveva ancamò un
discrètt esèrcit, ma i milanes podeven pù soffrill,
per conseguenza el decid de scappà in Germania da l'Imperator, affidand
el Castèll, che l'era pien d'ogni ben di Dio, de munizion e de omen,
al paves Bernardino da Corte cont l'ordin tassativ de difendel almen trii
mes, dopo i quai l'era cèrt de podè dagh man forte. Lodovico
l'è fllaa al duu Settembre del 1499 e el dì ses entra in
Milan, a la tèsta de l'esèrcit frances, Gian Giacom Triulz.
El primm mestee l'è quèll de fà arrend el Castèll.
Bernardino da Corte el ten dur per ona donzènna de dì, ma
dopo el s'è lassaa corromp... inscì i port de quèll
Castèll, che l'era la maggior fortèzza del Ducaa, s'hinn
dervii. El traditor Bernardin, quand el s'è vist schiivaa de tucc
come on appèstaa e disprezzaa di stèss frances, el s'è
tolt la vita... e l'ha faa benone. Milan el conta un vigliach e un traditor
de men. La fuga del Moro l'ha sbigottii tucc, perchè nissun avaria
mai pensaa ona roba simil! Parlèmm poeu minga di sò amis
che hinn rèstaa lì come quèi de la maschèrpa.
A ruvinà Lodovico l'è stada la mania del lusso, roba de non
cred adrittura, e per sta ben lu el faseva sta mal la popolazion e l'ha
giugaa la popolaritaa che’l s'era acquistaa in trent'ann!... e che l'era
minga poca. El gh'aveva poeu... che’l se credeva invulnerabil e i milanes
diseven: “Dio in cielo el Moro in terra savio sarà chi intenderà
questa guerra.” E inscì torna per la segonda volta in Italia i frances...
e lassa che la vaga! E intanta Milan l'è semper in man a can e borian.
Luis XII° el ven giò quasi... senza colpo ferire, come se dis,
a occupà el Ducaa de Milan el ses Ottober del 1499. Bisogna confessà
che in di vintisètt dì che'l Luis l'è staa chi, l'ha
faa di gran bèi robb e l'ha miss fina el Senato. L'omm, come omm,
l'era bon e l'ha savuu acquistass la simpatia de tucc, ma siccome el provèrbi
el dis che minga tucc i giambèll rièssen cunt el bus, inscì
de tucc i robb bèi che l'ha faa voeuna la gh'è propi riussida
mal, è l'è stada precisament quèlla de fa, prima de
tornà in Francia, governator de Milan el Triulz, dopo che l'aveva
creaa Maresciall de Francia. Lu el credeva de fa una roba ben fada, tanto
pù che l'era anca milanes, ma la manera de comportass del Triulz
coi so compatriott, l'aveva tanto indispèttii i milanes che ghe
n'aveven fin dessoravia di cavèi, al punto de accusall come traditor
del Re e de la Patria. Come hoo già ditt, Luigi XII°, l'è
staa chi circa un mes e quand l'è ritornaa in Francia el s'è
portaa cunt lu Francesco Sforza e el fiueu piscinin del pover Galeazz Maria
e de Isabèlla. Dato donca i bèi prodèzz del Triulz
i milanes, che da la pàdèlla, senza vorrèll, eren
borlaa in la brasa, fann del tutt per fa tornà indreè Lodovico.
El Moro, quantunque in Germania ospite de l'Imperator Massimilian, sentend
la nostalgia per el Ducaa de Milan, el pensa, scortaa de palanch, e tanti,
come l'era, de tirà aprèss Svizzer e Borgognoni, e quatter
mes dopo el torna in Lombardia e subit el ricupera i tèrr del Lagh
de Comm. Savuu la roba, i milanes se armen per andà contra i frances.
Sbaren i strad, fann sonà campann e martèll fasendegh ciappà
'na tal paura al Triulz, el qual el cred ben de daghen ona fètta.
Lodovico l'entra trionfalment in Milan applaudii da chii prima l'aveven
schivaa, al quatter Febbrar del 1500, el che voeur di cinqu mes e duu dì
dopo che l'era andaa via. Però el trionfo del Moro el dura poech.
Subit el va cont i so Svizzer per assedià Novara, ma el ven lu stèss
assediaa dal Triulz. Lodovico el se ved pèrs e inveci de seguì
l'esempi di so soldaa lombard è fass largo cont la spada in man,
el tenta de scappà travèstì de fantaccin svizzer,
ma l'è ricugnussuu, faa presonee e inscì consciaa el ven
portaa davanti al so mortal nemis Gian Giacom Triulz. E quèsta credi
che la sia stada la sua pussee grand umiliazion. I milanes, o per di mèi
i poèta popolar, faseven parlà inscì Lodovico:
E così estinta tutta la mia gloria Ch'era nel mondo già tenuto un Dio.” |
|
tel.02 9837517 Melegnano Via Castellini, 27 |