ORATIONES QUINDECIM
SANTÆ BRIGITTÆ
DE PASSIONIS DOMINI
ad vetustissima exemplaria diligenter
correctæ, cum aliis quibusdam piissimis precibus
Sumptibus Perillris
Mgfci Generosi
Dni Petri Klodnicki
Camenec-Podoliæ
REIMPRESSÆ
POCZAJOVIÆ
typis S.R.M. in Monaste: O.S.B.M. Annô D. 1775
REIMPRIMATUR
HIERONYMUS STRZELECKI
S. Basilii M. Hieromonachus,
Libror. per Diœc. Luceor. & Ostrog. Censor Ordinarius.
Datt. Poczajoviæ, Annô 1775
Die 17. Octobris. v.s.

Sancta BRIGITTA, amatrix ferventissima Domini Nostri JESU Christi, ejusque passionis: ora pro nobis miseris peccatoribus, ut salvemur, et ad æterna gaudia collocemur. Amen.

Ad Dominum JESUM.

Dignare me laudare te benignissime Domine JESU Christe, et sanctissimæ passionis tuæ laudes decantare. Da mihi virtutem contra hostes tuos, et inimicos meos. Amen.

ORATIO PRIMA.

O Domine JESU Christe æterna dulcedo te amantium, jubilus excedens omne gaudium, omnesque desiderium, firma spes desperatorum, vera salus miserorum, pius et misericors amator omnium pœnitentium peccatorum, qui delicias tuas attestatus es, esse cum filiis hominum, propter hominem homo factus, in fine temporum, memento pie JESU omnis præmeditationis, et intimi mœroris, quem ab initio conceptionis tuæ in humana natura et corde sustinuisti et habuisti, maximè instante saluberrimæ Passionis tuæ tempore, in Divino corde ab æterno deliberato, et præordinato. Memento pie JESU omnis tristitiæ et amaritudinis, quam in anima tua te ipso attestante habuisti, quando dixisti: tristis est anima mea usque; ad mortem: et quando in ultima Cœna Discipulis tuis Corpus et Sanguinem tuum tradidisti, pedes eorum humiliter lavisti, et dulciter eos consolando imminentem passionem tuam prædixisti. Memento pie JESU tremoris, angustiæ, et doloris, quæ in corpore tuo delicato ante passionem Crucis tuæ pertulisti pro me, quando in monte Oliveti post trinam orationem, et sanguineum sudorem, à discipulo proprio tradebaris, ab electa tuda gente capiebaris, à tribus judicibus injustè judicabaris (in electa Civitate tua Hierusalem, in Paschali tempore, in florida corporis tui juventute) innocenter damnabaris, trahebaris, capiebaris, verberabaris, trudebaris, conspuebaris, vestibus propriis exuebaris, vestibusque alienis induebaris, oculis et facie velabaris, colaphizabaris, alapis cædebaris, spinis coronabaris, et arundine in capite premebaris, ac faciebaris, et innumerabilis aliis calumniis lacerabaris ac fatigabaris. O Dulcissime Domine JESU Christe, da mihi quæso, ob memoriam harum pœnarum, et passionum, quas ante Crucis tuæ passionem sustinuisti, veram ante mortem meam cordis contritionem, fontem jugem lachrymarum, puram oris confessionem, condignam satisfactionem, et omnium peccatorum meorum plenariam remissionem. Amen.

Ave benignissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO SECUNDA.

O Domine JESU Christe, vera libertas Angelorum, et Paradisus deliciarum, memento pie Domine JESU terrorum et horrorum, quos sustinebas, quando omnes inimici tui, quasi leones ferocissimi, et fortissimi, horribilibus, et iracundis oculis te circumsteterunt, et crinium depilationibus cæterisque asperrimis, crudelissimis, et inauditis suppliciis, et horribilibus plagis te molestaverunt. Eja dulcissime Domine JESU Christe, quibus et quantis injuriis, violentiis, blasphemiis, et afflictionibus te affecerunt, per omnia contumeliosa, et dura verba, duriosa verbera, durissimaque tormenta, quibus omnes inimici tui te afflixerunt, deprecor te pie JESU, ut liberes me ab omnibus inimicis meis visibilibus, et dones mihi sub umbra alarum turaum protectionem salutis æternæ invenire. Amen.

Ave pretiosissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO TERTIA.

O Domine JESU Christe, mundi Fabricator, et creator, ac humani generis Reparator, quem nulla dimensio verô terminô metitur, qui Cœlum et terram palmo concludis, recordare amarissimi doloris, quem sustinebas, dum perfidissimi Judæi sanctissimas manus, et delicatissimos pedes tuos ad Crucem obtusis clavis primo affixerunt, et cum non esses conveniens voluntati eorum, in longitudine et latitudine corporis tui, ad foramina per ipsos in Cruce perforata, dolorem super dolorem sacratissimis vulneribus tuis addiderunt, et ita crudeliter te funibus distraxerunt, et extenderunt, in longum et latum Crucis tuæ, ut dissolverentur omnes compages membrorum tuorum. Deprecor te dulcissime Domine JESU Christe, per hujus sacratissimi, et amarissimi in Cruce doloris memoriam: ut des mihi timorem et amorem tuum, cum proximi mei dilectione. Amen.

Ave piissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO QUARTA.

O Domine JESU Christe, Rex æterne, Cœlestis Medice humani generis, recordare langvoris, livoris, et doloris tui, quos in alto Crucis patibulo levatus passus es in omnibus dilaceratis membris tuis, quorum nullum in suo recto flatu permanserat, ita, ut nullus dolor tuo dolori similis inveniretur, quia à planta pedis, usque ad verticem capitis tui, non fuit in te sanitas, nec aliqua pars corporis tui illæsa; et tunc omnium dolorum tuorum immemor, Patrem pro inimicis tuis pie exorâsti, dicens: Pater ignosce illis, quia nesciunt, quid faciunt. Per hanc miram benignitatem, et misericordiam, et ob memoriam illius doloris, concede mihi mitissime Domine JESU Christe, ut hæc memoria amarissimæ passionis tuæ sit omnium peccatorum meorum plenaria remissio, et omnium malorum meorum totalis effugatio, sitque contra omnes diabolicas infestationes et tentationes corporis et animæ meæ firmissima tuitio, et defensio. Amen.

Ave misericordissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO QUINTA.

O Domine JESU Christe, Speculum claritatis æternæ, Sapientia summi Patris, memento illius mœroris tui, quem in corde tuo habuisti, quando in speculo serenissimæ Majestatis Tuæ conspexisti prædestinationem electorum tuorum, per merita passionis tuæ salvandorum, et reprobationem malorum, per ingratitudinem damnandorum; et per abyssum miserationis tuæ, quam nobis miseris, perditis, et desperatis peccatoribus tunc condoluisti, et lacrymatus fuisti, et præcipuè per misericordiam, quam latroni in Cruce exhibuisti, dicens: hodie mecum eris in Paradiso; rogo te Domine JESU Christe, Deus meus, ut facias mecum largifluam misericordiam tuam, nunc, et in hora mortis meæ. Amen.

Ave dulcissime JESU Christe, miserere mihi peccatori, Amen.
Pater noster, Ave Maria, etc.

ORATIO SEXTA.

O Domine JESU Christe, Rex Amabilis, et Amice totus desiderabilis, memento illius mœroris quem habuisti, quando ab omnibus amicis et notis tuis derelictus nudus, et miserabilis in Cruce pependisti, et omnes amici tui ac noti tui, adversum te steterunt, nullumque consolantem inveniebas, nisi solam dilectissimam Genitricem tuam Virginem MARIAM, in agone fidelissimè tibi adstantem in amaritudine animæ suæ, quam Discipulo tuo Joanni commendasti et ipsum Discipulum pro te et Filium dedisti, dicens: Mulier, ecce Filius tuus! et ad Discipulum: Ecce Mater tua! Rogo te piissime Domine JESU Christe, per gladium doloris, qui tunc animam ejus et cor pertransivit, et per compassionis tuæ affectum, in quo Materno dolori condoluisti, ut compatiaris; subvenias mihi in omnibus tribulationibus, adversitatibus, et solicitudinibus, necessitatibus, angustis et afflictionibus meis corporalibus, et spiritualibus, et da mihi consolationem in omni tempore tribulationis meæ. Amen.

Ave desideratissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO SEPTIMA.

O Domine JESU Christe, Corona jucunditatis, Thesaurus felicitatis, Origo consolationis, et Fons inexhaustæ pietatis, qui ex intimo dilectionis affectu in Cruce pendens dixisti: sitio, scilicet salutem humani generis. Ascende, quæsumus Domine, et trahe nostrum desiderium, ad omne opus perfectum, et sitim carnalis concupiscentiæ, æstumque humanæ dilectionis in nobis penitus refrigera, et exstingve. Amen.

Ave delicatissimè Domine JESU Christe, miserere mihi peccatori, Amen.
Pater noster, Ave Maria, etc.

ORATIO OCTAVA.

O Domine JESU Christe, vera lux credentium, æterna dulcedo cordium, ingensque consolatio et svavitas mentium, per amaritudinem aceti, et fellis, quam po nobis sustinuisti, et degustâsti in Cruce, in hora mortis tuæ: concede nobis miseris peccatoribus, Corpus et Sangvinem tuum omni tempore, et præcipuè in hora mortis nostræ dignè percipere, in remedium, consolationem, et salutem animarum nostrarum pariter et corporum; quatenus hoc dignissimum et alia salutifera Sacramenta, dignè à nobis percepta liberent, et præservent nos ab omni malo, et faciant nos cum plena securitate, et jucunditate feliciter apparere in conspectu Divinæ Majestatis tuæ. Amen.

Ave masvetissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO NONA.

O Domine JESU Christe, virtus Regalis, jubilusque mentalis, memento angustiæ et doloris, quæ passus es in Cruce pro nobis, quando per mortis amaritudinem et Judæorum nimiam derisionem, blasphemationem, insultationem, cum magna voce et lachtymantibus oculis, Te a DEO Patre tanquam derelictum, clamasti dicens: Eli, Eli, lamasabathani. Quod est: Deus meus, Deus meus, ut quid dereliquisti me. Per hanc angustiam et dolorem, peto à te humiliter svavissime Domine JESU, ut nunc, et in omni angustia, maximè in hora mortis meæ, non derelinquas me Domine DEUS meus. Amen.

Ave patientissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO DECIMA.

O Domine JESU Christe, Alpha et Omega, principium, et finis, unio, et virtus in omni medio, recordare, quod à summo capitis, usque ad plantam pedis, in aquis passionum, te demersisti. Rogo te benignissime Domine, propter latitudinem, longitudinem, magnitudinem, et multitudinem vulnerum tuorum: aufer à me amorem sæculi, et doce me per veram, et perfectam charitatem, jugiter custodire mandatum tuum latum nimis. Amen.

Ave sapientissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO UNDECIMA.

O Domine JESU Christe, summa bonitas, æterna beatitudo Sanctorum tuorum, abyssus profundissimæ misericordiæ: rogo te, propter profunditatem vulnerum tuorum, quæ pertransierunt carnem tuam, medullam ossium tuorum, et intima viscerum tuorum, ut me submersum in peccatis, immergas, et abscondas in foraminibus vulnerum tuorum, à facie itæ tuæ, donec pertranseat furor tuus Domine. Amen.

Ave potentissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO DUODECIMA.

O Domine JESU Christe, speculum veritatis, signum unitatis, et vinculum charitatis: memento innumerabilium vulnerum tuorum multitudinis, quibus à summo capitis, usque ad ima pedum tuorum vulneratus fuisti, et à crudelibus, impiis, et iniquis Judæis laceratus, et sanctissimo Sanguine tuo rubricatus: quam dolorum magnitudinem in virginea carne tua pertulisti, pro nobis pie JESU Christe; quid ultra facere debuisti, quod non fecisti? Scribe, quæso, misericordissime Domine JESU Christe, omnia vulnera tua, in corde meo pretiosissimo Sangvine tuo, ut in illis legam dolorem, et amorem tuum, ut eorum memoria semper apud secretum cordis mei permaneat, ut dolor passionis tuæ quotidie in me renovetur, et amor augeatur, ut in gratiarum actione, usque ad finem vitæ meæ, jugiter perseverem, donec veniam ad te, desideratum Thesaurum omnium bonorum, et gaudiorum plenum; quod mihi donare digneris, dulcissime Domine JESU Christe. Amen.

Ave spledidissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO Decima Tertia.

O Domine JESU Christe, Leo fortissime! Rex immortalis et invictissime! memento angustiæ, et doloris, quæ passus es, cum omnes vires Cordis, et Corporis tui penitus defecerunt, et inclinato capite, cum dolore mortis dixisti: Consummatum est. Per hanc angustiam, et dolorem tuum, te supliciter oro, et devote rogo Celementissime Domine Jesu Christe, miserere mei, et sucurre mihi nunc, et in ultima consummatione exitûs vitæ meæ, cúm anima mea anxiata fuerit, et spiritus meus conturbatus. Amen.

Ave nobilissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO Decima Quarta.

O Domine JESU Christe, unigenite! Altissimi Patris Splendor, gloria, et figura substantiæ ejus, memento subnixæ commendationis tuæ, quâ spiritum tuum piissimum, Omnipotenti Patri tuo commendasti, dicens: Pater, in mane tuas commendo Spiritum meum, sicque in Cruce elevatus pependisti, cum lacerato Corpore, cum sangvineis vulneribus, cum defluentibus rivis, cum pallida facie, cum mortali Corpore, cum capite spinis coronato, cum expansis manibus, cum extensis brachiis, cum dilaceratis , et dissolutis venis, cum confractis membris, cum patefactis visceribus misericordiæ tuæ, cum lachrymosis ac tenebrosis oculis, cum aperto ore, cum rauca voce, cum gemebundo gutture, cum fitibundo pectore, cum rupto Corde. O clementissime Domine JESU Christe, qui in tantis doloribus sacratissimum, et innocentissiomum Corpus tuum, pro peccatis nostris amarissimæ morti tradidisti, et spiritum tuum, pro nobis miseris peccatoribus redimentis misericors misisti. Per hanc pretiosissimam, innocentissimam, et amarissimam mortem tuam, et virtutem sanctæ Crucis tuæ, deprecor te, Domine JESU Christe, Pater misericordiarum, et Rex Sanctorum petonrissime: conforta me ad resistendum diabolo, mundo, et carni, ut mundo mortuus, tibi soli vivam, et in novissima hora exitûs mei suscipe revertentem ad te spiritum meum exulem, ac peregrinum. Amen.

Ave virtuosissime Domine JESU Christe, miserere mihi peccatori, Amen.
Pater noster, Ave Maria, etc.

ORATIO Decima Quinta.

O Domine JESU Christe, vitis vera et fecunda, memento superfluentis et abundantis effusionis Sanguinis tui, quem de corpore tuo, sicut de botro expresso, copiosè effudisti, quando in Cruce torcular solus calcâsti, et lancea militari latere perfosso nobis Sanguinem, et Aquam propinâsti, ita ut minima gutta in te remanserit, tunc demum quasi myrrhæ fasciculus fuisti in altum suspensus, nam delicata Caro tua evanuit, liquor viscerum exaruit, et medulla ossium tuorum, emarcuit: per hanc pretiosissimi Sanguinis tui effusionem, et amaram passionem, et mortem tuam, et per mnia sacratissima, et dulcissima vulnera tua, precor te culcissime Domine JESU Christe, vulnera cor meum tui amore, quo Sanctissima Mater tua sub Cruce fuit vulnerata, ut pœnintentiæ, et amoris lacrymæ sint mihi panes die, ac nocte, et converte me totaliter ad te, ut cor meum fiat tibi perpetuum habitaculum, et conversatio mea tibi beneplacita, et accepta sit, ac finis vitæ meæ ita laudabilis, ut post hujus vitæ terminum, te laudare merear cum omnibus Sanctis tuis in æternum, et in sæcula sæculorum. Amen.

Ave dignissime Domine JESU Christe, miserere mihi peccatori, Amen.
Pater noster, Ave Maria, etc.

O Domine JESU Christe, Fili DEI vivi, suscipe has Orationes in amore illo superexcellenti, in quo omnia vulnera sanctissimi corporis tui sustinuisti, et miserere famuli tui N. et omnibus peccatoribus, cunctisque fidelibus, tam vivis, quam defunctis; da misericordiam, gratiam, et remissionem: ac vitam æternam. Amen.
 

   
You can email me on
[email protected]