Les quinze Oroisons saincte Brigide, translateez de latin en francoiz

Une femme recluse et solitaire, nommee Brigide, couvoitant scavoir le nombre des plaies de nostre seigneur, tant depria que luy mesmes luy revela et dist: Tu diras chascun jour, par ung an entier, quinze fois PATER NOSTER, AVE MARIA. Et ceste oraison cy dessoubz escripte, c’est assavoir : O Jesu ! chascun jour en gemissant tes pechez, et a chascune partie d’icelle oraison une fois PATER NOSTER, AVE MARIA, laquelle est divisee en quinze parties : et autant de plaies furent en mon corps. Et saiches que quiconcques la dira, par l’espace d’ung an, bien et devotement chasqun jour en meditant ma passion, quinze ames de sa lignee seront de purgatoire delivrees et quinze qui seront justes confermees en bon estat. Et celuy qui la dira aura grace de parfection et congnoissance et amere contriction de tous ses pechez et, quinze jours devant sa mort, recevra mon sainct corps qui le delivrera de l’eternelle dampnation d’enfer ; et l’abruveray de mon sang et mectray devant luy le signe de ma tresvictorieuse croix en son aide a l’encontre de tous ses ennemys. Et avec moy, a sa mort, viendra ma treschiere vierge mere ; et prandray l’ame de luy et la mectray en joye eternelle ou je luy verseray ung singulier puisement de la fontaine de ma deite. Et effaceray tous les pechez qu’il aura commys et quelconque chose qu’il me demande, ou a ma mere, il obtiendra et le feray prouffiter en vertus et le conserveray en bonne vie et si le garderay comme s’il eust toujour vescu selon mes commandemens et, si demain devoit mourir, sa vie sera eslongnee. Et autant de fois qu’il dira ceste oraison il aura quarante jour de pardon.

(Patrz też / Siehe auch / See also: "UPPSATSER I ROMANSK FILOLOGI: Les quinze Oroisons saincte Brigide - DE HEL. BIRGITTA TILLSKRIFNA FEMTON BÖNERNA efter ett unikt fransk manuskript i National-Biblioteket i Paris utgifna af CARL WAHLUND, UPSALA 9 APR. 1901, ALQUIST & WIKSELLS BOCKTRYCKERI-AKTIEBOLAG")

 
You can email me on
[email protected]