Das erst gebettly.

O Herr iesu christe, ewige süsikeit dyner liephaberen, iubel über alle fröide, und über alle hoffnung und begyrde, heil und liephaber der büßenden sünder, du hast bezügt, din wollust sye by der menschen kynder, umb des menschen willen mensch worden, am ende der zitt,
Gedenck aller vorbetrachtunge und innerlicher betrüptnuß, die du in menschlichen lib gelitten hast, da das heilsam zitt dins lydens, in dinem göttlichen hertzen fürsehen und beschickt ward,
Gedenck der trurikeit und der bitterkeit, die die din sele leyd, als du selbs bezügtest, da du am letzten nachtmal, dinen iungeren dynem fronlichnam, und din blůt ze nyeßen gebt, da du ire füß wüscht, und mit süßen worten sy trostest, und dyn künfftig lyden inen offnetest,
Gedenck herr, alles des stridlens, betrüptnuß, engsten und smertzens, so du in dinem zarten lib vor den lyden dins krützes gelytten hast, da du nach trifaltigem gebett, und nach dem blůtigen switzen, von iudas dynem iunger hyngeben, und von dem ußerwelten volck gefangen, von valschen gezügen verclagt, von dryen richtern unrechtlich verurteilt, in der ußerwelten statt, in österlicher zitt, in blügender libs iugend, unschuldiclich verdampt, diner eignen kleyder entplößt, mit frömbden smechlichen kleydern bekleydt, mit halls schlegen, ougen und antlit verbunden, mit baggen schlegen geslagen, an eyn sul gebunden, gegeyslet, mit thornen gekrönt, mit eynem ror an dyn houpt geslagen, und mit vil andern smacheyten verletzt wurdt, Ich bitt dich herre, gib mir durch diser dyner smach und lydens gedechtnuß, vor dynem krütz, waren rüwen umb myn sünde vor mynem tod, lutere bicht, volkomne ablegung, und aller myner sünden gantze vergebung,
Amen. Pater noster, Ave maria.

Das ander gebettly.

O Herr iesu christe, ware fryheit aller engelen, paradiß alles wollusts,
Gedenck der betrüpnuß und des grüsels, so du empfiengt und lydt, da alle dine fyende, als die grymmen löwen umb dich stůnden, und dich mit halls slegen, mit verspüwung, mit roussen und mit anderen ungehörten pynen, dich bekrancktend, und mit allen lasterworten, und großen hertten verserungen, dich herr iesu christe, pyngettend,
Bitt ich dich, löse mich von allen mynen fyenden, sichtbaren und unsichtbaren, und verlich mir, daz ich under dem schatten dyner flügeln, mit bewarung ewigs heils funden werde,
Amen, Pater noster, Ave maria.

Das dritt gebettly.

O Herr iesus stiffter der welt, den keyn ußmessung entlich umbgriffen mag, der das ertrich in sin spang begrifft,
Gedenck dyns allerbittersten smertzen, den du litt, da dir din allerheiligsten hende an das krütz, mit stumppfen nageln gehefft wurden, und zů durchgraben dyn allerzartesten füße, da du irs willens nit füglich werdt, smertzen über smertzen, dynen wunden zůfügtend, und dich so unmilticlich stracktend und zertanntend, nach der lenge, und übersitz, an den krütz,
Also daz dyne büg und glyder gelediget wurden von eynander,
Ich bitt dich herr, durch diser heiligen und allerbittersten pyn am krütz gedechtnuß, daz du mir gebest din heiligen forcht und liebe,
Amen. Pater noster, Ave maria.

Das vierd gebettly.

O Herr iesu christe, hymelscher artzat,
Gedenck des smertzens, der blödikeit und der pyn, die du an dem hohen boum des heiligen krützes uffgerichtet, empfiengt, da du aller diner glyder zerryßen, dera keyns in sinem wesen bleib,
Also daz keyn smertz dynem lyden glich mag funden werden,
Denn von der fůßsolen uff, biß in die obersten harscheittlen, was keyn gesuntheit an dir,
Und du doch unbedacht aller dyner pyn, dynen vatter für dyne fyend bet, und sprecht,
Vatter verzich inen, denn sy wüßen nit was sy thůnd,
Durch dise din barmhertzikeit und durch gedechtnus diss großen smertzen, verlich mir herre, daz dise gedechtnuß dyns bitteren lydens, mir sye eyn vollige vergebung aller myner sünden,
Amen. Pater noster, Ave maria.

Das fünfft gebettly.

O Herr iesus, spiegel der ewigen klarheit,
Gedenck der gedechtnuß die du hattest, da du in den spiegel diner allerschönsten maiestat ansecht die fürschickung dyner ußerwelten, die durch verdienung dins lydens solten behalten werden, und die hynwerffung der großen menge der bösen,
Und durch den abgrund dyner erbermde, durch den du uns verlornen und verzwifelten sünderen desmals mitlyden trůgt, und besunder dem schacher am krütz bewißt hast, da du sprecht,
Hüt wirstu by mir syn im paradiß,
Bitt ich dich, milter herr iesus, thů mir gnad und barmhertzikeit, in der stund myns tods,
Amen, Pater noster, Ave maria.

Das sechßt gebettly.

O Herr iesus, lieplicher küng, eyniger fründ, und gantz begirlich,
Gedenck der trurikeit die du hattest, da du nackend und ellend, am krütz hiengst, von alle dine fründ und bekannten wider dich stůnden, und du keynen trost fundt, denn alleyn dyn lieben můter, die dir in bitterkeit ir selen trüwlichen bystůnd, die du dem lieben iunger bevehlt, und sprecht, frow nym war din sun,
Bitt ich dich gütiger herre iesus, durch das swert des lydens, das desmals durch ir sele gieng, laß mich dich erbarmen, in allen mynen kestigungen und widerwertikeiten, liplichen und geistlichen, und bewise mir trost in zitt der betrüptnuß, und in der stund myns tods.
Amen. Pater noster, Ave maria.

Das sibend gebettly.

O Herr iesus, brunn der unerschöppflichen miltikeit, der uß innerclichen begirden am krütz sprecht,
Mich türstet,
Nemlich nach dem heil der menschen,
Wir bitten dich daz du unser begirden anzündest, zů allen volkomnen wercken, und den turst nach den fleischlichen begirden, und die hitz zittlicher wollüsten, in uns gantz und gar külest und löschest,
Amen. Pater noster, Ave maria.

Das achtist gebettly.

O Herr iesus, der hertzen süßikeit, und große süße wunn der gemüt, durch bitterkeit der gallen und des essich, so du für uns versůcht und gelitten hast,
Verlich uns in der stund des tods, din heilig fleisch und blůt wirdiclich ze nyeßen, zů seliger artznye und trost unser selen,
Amen, Pater noster, Ave maria.

Das nünde gebettly.

O Herr iesus, küngliche tugend, und hertzliche fröide, und gemüts iuflikeit,
Gedenck der engsten und smertzen, die du gelitten hast, da vor großer tods bitterkeit, und der iuden beschryung, du mit großer stymm ußrůfftist, als ob du von gott dinem vatter verlaßen werest, und sprecht,
Myn gott, myn gott, wie hastu mich verlaßen,
Durch die selben großen angstberkeit bitt ich dich, daz du uns in unsern engsten nit verlaßest herr unser gott,
Amen, Pater noster, Ave maria.

Das zehend gebettly.

A Herr iesus, anfang und ende, vereynung und krafft in allem mittel,
Gedenck wie du du dich vom obersten dins houpts, biß zů der fůßsolen, in wasser dins lydens ingesenckt hast,
Und umb dyner wunden wijte und lenge, underwise mich durch ware liebe, din gar wijt gebott volbringen, aller sünden übel hin gelegt,
Amen, Pater noster. Ave maria.

Das eylifft gebettly

O Herr iesus, abgrund der allertieffisten barmhertzikeit,
Ich bitt dich durch tieffe aller diner wunden, die durch dins fleischs und margs und diner glyder march durchtrungen sind, daz du mich ingetunckten und in sünden versenckten ußhebest, und mich verbergest in den löchern diner wunden, vor angesicht dins zorns, biß daz din zorn vergang,
Amen. Pater noster, Ave maria.

Das zwölfft gebettly.

O Herr iesus, spiegel der warheit, zeichen der eynikeit, band der liebe,
Gedenck diner unzalbarn wunden, mit denen du vom höchsten dins houpts, biß zů nyderist in dyn füße, verwundt, und mit dinem rosenfarwen blůt begossen bist, die großen burdy dins smertzen, so du in dynem iungfröwlichen fleisch umb unsern willen gelitten hast,
Gütiger herr iesus, was soltest me thůn denn du gethan hast,
Ich bitt dich, schrib alle din wunden in myn hertz mit dynem roten köstlichen blůt, in denen ich lese, dinen großen smertzen und din liebe, daz ich in danckbarkeit, und in dynem lob, biß in myn ende bestentlich beharre,
Amen, Pater noster, Ave maria.

Das dryzehend gebettly.

O Herr iesus, allerstarckister löw, untötlicher und unüberwyntlicher küng,
Gedenck des smertzen den du gelitten hast, da alle krafft dins libs und dins hertzen, dir gantz abnam, und du mit geneygtem houpt sprecht,
Es ist volbracht,
Durch dise angst, not und smertzen, erbarm dich über mich herr in der letzsten vollendung myner hynfart, so myn sele angstbar, und myn geist in betrüptnuß ist,
Amen, Pater noster, Ave maria.

Das vierzehend gebettly.

O Herr iesus, eyngeborner sun des obersten vatters, glantz und figur siner substantz,
Gedenck der ernstlichen bevelhnuß, als du dynen geist dinem hymelschen vatter bevelht, und sprecht,
In din hende bevilh ich mynen geist,
Und mit zerrissnem lyb, mit zerbrochnem hertzen, mit starckem geschrey, mit uffgethanen glydern dyner barmhertzikeit, umb unser erlösung verscheiden bist,
Durch den selben dynen kostlichen tod, bitt ich dich herr, küng aller heiligen, daz du mich sterckest, daz ich dem fleisch, der welt, und dem bösen fyend mög widerstan, und der welt abgestorben dir lebe, und in der letzten stund myner verscheidung, du mynen widerkerenden geist ellend und verlaßen zů dir empfahest,
Amen, Pater noster, Ave maria.
 

Das fünffzehend gebettly.

O Herr iesus, warer und fruchtbarer rebstock,
Gedenck des übergnůgsamen und überflüßigen vergießens, dins heiligen blůts, das du glich als uß dem trübel, volkommenlich ußgetrottet, und vergossen hast, da du an dem heiligen krütz, die trotten alleyn getretten, und von des ritters sper uß dyner uffgethanen sijten, uns wasser und blůt geschenckt hast,
Also daz in dir nit bleib das allermynst tröppfly,
Zů letzst uff gehenckt in die höhe, als eyn büschelly mirrens, din zart fleisch verdorret, und dyner glyder füchtikeit ußgeterrt, und das march diner gebeyn verzert ist, durch dyn bitter lyden, und dins kostlichen blůts vergießung,
Bitt ich dich gütiger herr iesus, nym und empfach myn sele am iungsten hinzug,
Amen, Pater noster, Ave maria.

Eyn besluß der summ aller vorgeschribnen fünffzehen gebettly.

O Süßer herr iesus, verwund myn hertz, daz die trehen warer penitentz, und diner liebe, mir syen das brot tag und nacht, und züch mich gantz zů dir, daz myn hertz dir werde eyn ewige statt und in wonung,
Und myn wandel und leben dir gefalle und genem sye, und das ende myns lebens so löblich sye, daz ich durch und nach vollendung diser zitt, dich wirdiclich loben möge mit allen dynen heiligen ewiclich, Amen.

Nach yeglichen fünff Pater nosteren als vor stat, so sprich diß gebettly.

HErr iesu christe des lebenden gotts sun,
Nym diß gebett, in der großen liebe, in dera du alle dyn wunden dyns heiligen libs gelitten hast, und erbarm dich über mich din arme geschöppft, N, und allen sündern, und allen glöibigen, lebenden und todten, gib dyn barmhertzikeit, gnad und applaß, und das ewig leben, Amen.

Hie enden sich sant Brigitten gebettly.

Tekst pierwotny / Urtext / Original

Übersetzung / Tłumaczenie / Translation

 
You can email me on
[email protected]