WIr lesen/ dz dize nachgeschriben fünffzehen gebettly/ von dem seligen lyden vnsers herrê iesu christi/ gar groß verdienê/ gnad vñ applaß/ dem menschen erwerbend/ Als dên sant brigitten der heiligen küngin võ sweden/ von gott dem herrê geoffnet ist/ Besunder als sy begerte ira ze offembaren/ wie vil wundê vnser herr iesus in synem lyb gehept/ vnd für die sündere gelittê hab/ ward ir geoffnet/ die zal/ nemlich/ fünff thusent/ vierhundert vñ sechtzig wundê/ Welicher mensch die selben wunden alle eren wœlte/ der mag eyn gãtz iar alle tag sprechen/ fünffzehê Pater noster/ vñ so vil/ Aue maria. Das trifft sich eyn gantz iar vmb/ so vil als die zal der heiligen wurden innhalter/ Also/ eyn gantz iar all tag fünffzehê Pater noster gebettet/ so hastu alle vnd yeglich wunden christi erlich gegrüßt vñ geeret/ Da mit ward sy vnderwißt/ dz sy dise nachgemeltê gebettly solte darzů sprechê/ zů yeglichem Pater noster/ eyns/ Stat daby/ daz alle die sœlich gebettly vñ fünffzehen Pater noster alle tag eyn gantz iar vß/ bettêd mit andacht/ dz die erwerbend vmb vnserê herrê dise ding/
Des ersten/ dz sy fünffzehen selê irs geschlechts vñ gesippt vß dê vegfhür erlœsend/
Vñ fünffzehen ir fründe/ die in gütem wandel in zitt lebêd gesterckt
vnd bestetiget werdê in gůtem/
Vnd fünffzehê sünder võ irem süntlichê lebê/ in eyn gůt bůßfertig lebê verwandlet werdê/
Vñ der mêsch selbs der diß bettet/ verdient vmb gott/ eyn selig bůßwürckend leben/ bekantnuß des gœttlichen willens/ vnd eynen seligen stat zů volkommenheit/
vñ dz im vor synem ende der zart fronlichnam vnsers herren verlyhê wirt ze nyeßen/vñ in fürer nyemer me hungert noch thürstet/
vnd das heilig fron krütz/ wirt vnser herre für syn angesicht vffrichten ze hillft wider alles bœsen fyende mit hilff vnd bystandt/
vnd anderê verheißungê syner milren gnaden/ &c.

Komentarz / Kommentar / Commentaries

 

 
You can email me on
[email protected]