WIr lesen/ daz dize nachgeschriben fünffzehen gebettly/ von dem seligen lyden unsers herren iesu christi/ gar groß verdienen/ gnad und applaß/ dem menschen erwerbend/ Als denn sant brigitten der heiligen küngin von sweden/ von gott dem herren geoffnet ist/ Besunder als sy begerte ira ze offembaren/ wie vil wunden unser herr iesus in synem lyb gehept/ und für die sündere gelitten hab/ ward ir geoffnet/ die zal/ nemlich/ fünff thusent/ vierhundert und sechtzig wunden/ Welicher mensch die selben wunden alle eren wölte/ der mag eyn gantz iar alle tag sprechen/ fünffzehen Pater noster/ und so vil/ Ave maria. Das trifft sich eyn gantz iar umb/ so vil als die zal der heiligen wurden innhalter/ Also/ eyn gantz iar all tag fünffzehen Pater noster gebettet/ so hastu alle und yeglich wunden christi erlich gegrüßt und geeret/ Da mit ward sy underwißt/ daz sy dise nachgemelten gebettly solte darzů sprechen/ zů yeglichem Pater noster/ eyns/ Stat daby/ daz alle die sölich gebettly und fünffzehen Pater noster alle tag eyn gantz iar uß/ bettend mit andacht/ daz die erwerbend umb unseren herren dise ding/
Des ersten/ daz sy fünffzehen selen irs geschlechts und gesippt uß dem vegfhür erlösend/
Und fünffzehen ir fründe/ die in gütem wandel in zitt lebend gesterckt
und bestetiget werden in gůtem/
Und fünffzehen sünder von irem süntlichen leben/ in eyn gůt bůßfertig leben verwandlet werden/
Und der mensch selbs der diß bettet/ verdient umb gott/ eyn selig bůßwürckend leben/ bekantnuß des göttlichen willens/ und eynen seligen stat zů volkommenheit/
und daz im vor synem ende der zart fronlichnam unsers herren verlyhen wirt ze nyeßen/und in fürer nyemer me hungert noch thürstet/
und das heilig fron krütz/ wirt unser herre für syn angesicht uffrichten ze hillft wider alles bösen fyende mit hilff und bystandt/
und anderen verheißungen syner milren gnaden/ &c.

Komentarz / Kommentar / Commentaries

 

 

Do spisu tresci / Zum Inhaltsverzeichnis / To the table of contents

 

 
You can email me on
[email protected]