WEr ein gantz jar dise gebett andechtigelich spricht von dem geschecht werden xv selen auß dem fegefeuer erloeßet
und auß seinem geschlecht werden - xv - sunder bekeret -
und - xv - gerecht auß seinem geschlecht werden in einem gutten standt bestetiget -
und er erwirbt darumb die ersten staffel der volkummenheit und erkentnus - auch ware rew seiner sund
Es hat auch gesprochen das pild des crucifixes wirdt yemant dise gebett andechtigelich verbringen dem wil ich geb meinen allerheilligisten leichnam funffzehen tag vor seinem ende dar durch er erlediget wirdt von seinem ewigen hunger -
Auch wil ich in trencken mit meinem alleredelsten pluet das er nit durst habe ewigelich -
Auch wil ich fuer in setzen das zaychen meines uberwintlichen creutzes zu hilfe wider seiner feinde anfechtung -
Auch wil ich vor seynem ende komen mit meiner erwelten muter und sein sele guetlichen auffnemen - und die fueren zu den ewigen frewden
und wann ich sie da hin bracht hab wil ich ir schencken einen besundern trunck von dem brunnen meiner gotheit - das ich den andern nit thun die dieses gebett nit verbracht haben -
Es ist auch zu wissen so ein mensch dreysig jar todtsunden gewesen wer und dises gebett andechtigelich spricht den wil got alle sein sund vergeben -
uber das beschutzet er in vor boser anfechtung
und behuet im sein funff sinne
und erloset in von dem gehen todt -
und erloeset in von der ewigen pein -
Item der herre Jesus wird im außtulgen alle sein sunde die er ye verbracht hat von kintheit her bis auff dise zeyt -
Er wurdt auch durch die gnade gottes besser dann er vor gewesen ist
und was er von dem herren Jhesu oder der heiligen junckfrawen Maria bitten wirdt das wurdt er erlangen -
Item der herre Jesus wil im helffen das er zu neme in gutten tugenten und guttem Leben -
Auch wil er in behalten und bestetten in einem gutten standt -
Auch ob er alle sein tag gelebt hett nach seinem eygen willen und solt als morgen sterben dem wirdt sein leben gestrecket -
Item so offt ein mensch die gebet andechtigelich spricht so hat er - xl - tag ablas -
und dar uber ist er sicher das er zugefueget wurdt dem aller hoechsten choer der engel -
Und so yemant dise gebett eynen andern lernet sein frewd und verdienstnus wirdt nymmermere abnemen sunder sie wird bleiben ewigelich -

@wo dise gebett sein oder gesprochen werden do ist got mit seinen gnaden gegenwertig und beschutzet in als er hat beschutzet sant Paul vor der dieffe des mers do die schiff zerprachen

Tekst pierwotny / Urtext / Original

Übersetzung / Tłumaczenie / Translation

 
You can email me on
[email protected]