 Assessorau de sa Limba Sarda |
 |
Prisia n. 12404 de su 3-04-2000 ---------- curadori: Corongiu
COMUNU DE CUARTU SANT'ALENI
PROVINCIA DE CASTEDDU
ARRESUMU DE DETZIDIDURA DE SA GIUNTA COMUNALI
SETZIADA de su 27-03-2000 Detzididura n. 121
Assessorau de sa Limba Sarda
Chistioni: Disinnu de defentza e
afortiamentu de sa lingua sarda in sa tzitadi de Cuartu
Sant'Aleni po mori de is fainas de s'Assessorau a sa
Lingua Sarda - Arricimentu e dispididura de su disinnu
aprontau de s'ofitziu - Incarrigu de ghìa de s'ofitziu
S'annu duamila, su de su mesi de
martzu a sa una de a merì, in s'aposentu de is
udentzias, tzerriada cunformi a is leis, est atobiada sa
Giunta
A s'apelliu arrespundint:
| Pres. | Ass. | ||
| Sindigu | Grazianu Milia | 1 | |
| Assessori Comunali | Bissenti Cossu | 1 | |
| Assessori Comunali | Dinu Dessì | 1 | |
| Assessori Comunali | Ida Farci | 1 | |
| Assessori Comunali | Aleni Ledda | 1 | |
| Assessori Comunali | Massimu Manca | 1 | |
| Assessori Comunali | Arrita Murgioni | 1 | |
| 4 | 3 |
Agiudat su secretariu generali Dott.
FILIPPO SPALLINA chi si pigat s'incarrigu de iscriri
custu arresumu.
Sendi cunformi a is leis su numeru de is atobiaus, su
Sindigu Dr. Grazianu Milia si ponit a ghia e decrarat
aberta sa Setziada po s'ammanixamentu de sa chistioni.
SA GIUNTA COMUNALI:
POSTU ANNANTI ca su
comunu de Cuartu Sant'Aleni at decrarau ca sa lingua
sarda est su sinnu prus sintzillu de s'identidadi de su
populu sardu e su marcu pretzisu de s'Autonomia de sa
Sardinnìa;
POSTU ANNANTI puru ca s'umpreu de sa
lingua sarda est ancu biu in sa tzitadi e ca su conottu
de is cuartesus est su fundoriu de su tempus benidori po
totu sa comunidadi sendi pretzisu agiudai un'anovamentu
de sa lingua po ndi fai unu mediu modernu;
POSTU IN CONTU ca su Parlamentu at
dispidiu sa ley de Su Stadu n°482 de su 15 de su mesi de
Idas 1999 pregonada in sa Gazeta Ufitziali de Su Stadu po
sa defentza e s'afortiamentu de is linguas de minorìa
inui funti dispostus cumandus e ordinis chi ant a depiri
fai carrigu a su Comunu;
POSTU IN CONTU puru ca giai de unus
cantus annus, cun s'agiudu de sa Regioni Autonoma de
Sardinnia e de S'Unioni Europea, s'assessorau de sa
Curtura at fatu meda e bogau a campu faìnas de importu
po sa chistioni de sa lingua chi ant torrau a custa
aministradura pubrica gratzias e arreconoscimentus de
ominis e istituzionis de curtura;
CUNSIDERAU ca po mori de sa ley noa de su Stadu,
po mori de sa ley de Sa Regioni numuru 26 de su 1997, po
mori de is fiantzas de S'Unioni Europea is cumpetentzias
de custu argumentu funt amaniendi e tenit abisongiu de
unu ofitziu prepostu po essi sighias cun abistentzia;
CUNSIDERAU puru ca in custu Comunu, in s'ofitziu
de is Arrelatas Pubricas dirigiu de su dr. Peppe Corongiu,
du at is cumpetentzias po produsiri autus e paperis in
lingua sarda e po agiudai s'assessori incarrigau Aleni
Ledda in sa mungia de aprontamentu de s'ofitziu, in su
disinamentu de is fainas, in s'arrelatu cun is aturas
aministraduras;
ARRECIU su disinnu de tutorìa e afortiamentu de
sa lingua in sa tzitadi aprontau de s'ufitziu;
ARRECIA puru sa littera de su dr. Peppe Corongiu
chi oferit su propriu treballu chentza pediri dinai in
prus in sa mesada;
APRETZIAU ca est pretzisu a dispidiri su
disinnu aici comenti est po poniri is ofitzius in
capassidadi de inghitzai su treballu e ca est pretzisu
puru incarrigai su dr. Corongiu ca giai de annus at
treballau in su campu de sa lingua sarda;
INTENDIUS is parris de su Dirigidori de s'Ufitziu
e de su Dirigidori de sa Contadoria, cunformi a s'ex art.53,
L. 142/90;
CUNFIRMADA de su Dirigidori de sa Contadoria sa
seguresa de fiantza cunformi a s'ex art.55, L. 142/90;
PARIS,
DETZIDIT
1) de aproai, dispidiri e fai comenti
chi fessat su suu su disinnu de defentza e afortiamentu
de sa lingua sarda in sa tzitadi de Quartu Sant'Aleni po
mori de is fainas de s'Assessorau a sa Lingua Sarda chi
si ligat a custa detzididura comenti parti de su paperi
intreu cun balidura matessi;
2) de incarrigai su dr. Peppe Corongiu a ghiai s'ofitziu
de sa ligua sarda aici comenti issu etotu at dimandau po
agiudai s'assessori Aleni Ledda;
3) de donai impellida po aprontai is autus e is paperis
in limba sarda bastantis po inghitzai is fainas de s'ofitziu
e arrelatai cun is atras aministraduras interessadas a sa
chistioni de sa lingua;
4) de ligai puru a custa detzididura scritta in limba
sarda cussa tradusia in limba italiana (chi at a depiri
pigai su propriu numuru de prisia) comenti parti de su
paperi intreu cun balidura matessi cunfrommi a is leis de
su Stadu 482/99 e de sa Regioni Sarda 26/97, e de ligai
puru is aturus autus e sa littera de su dr. Peppe
Corongiu cunfrommi a is proprius leis;
5) de cunfirmai ca sa detzididura presenti, cun votamentu
a parti, est decrarada a balidura subitana cunformi a su
3 comma de s'art.47 L.08.06.1990, n°142.
Ligiu, cunfirmau e frimau.
SU SINDIGU Dot. GRAZIANU MILIA
SU DIRIGIDORI DE S'OFITZIU DE SU SINDIGU RAG. CANDIDU SECCI
SU DIRIGIDORI DE SA CONTADORIA DOT. SALVATORE PUDDU
SU SECRETARIU GENERALI DOT. FILIPPO SPALLINA
Ligau: CABUDU DE TOTUS IS CHISTIONIS
Ligau: UN'ASSESSORAU PO SA LIMBA IN QUARTU SANT'ALENI
Ligau: ITA AT FATU, ITA EST FAENDI, ITA AT A FAI
