 Assessorau de sa Limba Sarda |
 |
COMUNU DE CUARTU SANT'ALENI
ASSESSORAU DE SA LINGUA SARDA
DISINNU DE DEFENTZA E AFORTIAMENTU DE SA LINGUA SARDA
UN'ASSESSORAU PO SA LIMBA IN QUARTU SANT'ALENI
Su dexasetti de su mesi de Idas 1999, su Comunu de Quartu Sant'Aleni at detzidiu de aberriri unu assessorau nou mai biu in Sardigna: su de sa limba
sarda. Su sindigu Milia at nomenau Aleni Ledda a capu e at cuncordau s'ordinìu de is ufitzius po su treballu, allistrendidu in is paperis
ufitzialis de s'aministradura. Custa detzididura at tentu tretu a pustis chi su Parlamentu at dispidìu sa ley statali de defensa e afortiamentu de
is limbas de minorìa. Custa est istada una nova de grandu inportu, s'iat a podiri narriri, chi at fatu nasciri s'abisongiu in su Comunu, su de tresi
po biventis in Sardigna, de aprontai is medius bastantis po poniri menti a is disponiduras de sa ley.
Sa detzididura de creai custu assessorau nou at tentu un'arrexoni politica puru, un'arrexoni crara e pretzisa: sa limba est su fundamentu primu de
s'Autonomia de sa Sardigna e su sinnu prus sintzillu de s'identidadi de su populu sardu. Duncas, in sa tzidadi de Quartu, s'aberridura de un'incarrigu
dispostu comenti custu tenit s'idea de arregordai a totu sa genti ca sa limba no serbit a fueddai sceti, ma est su marcu pretzisu de sa storia e de sa curtura nosta.
Sa mòvida de tutorìa de sa limba no cumentzàt in Quartu cun su nascimentu de s'ufitziu nou. Giai de unus cantus annus s'assessorau de sa Curtura
dirigiu de Aleni Ledda iat fatu meda e bogau a campu faìnas de importu po sa chistioni limbistica. Intremesu de totus, si ndi podint arregodai tresi: sa prima, su de airi
postu in sa constitutzioni de su comunu sa possibilidadi de fueddai in sardu in su Consillu; sa segunda, su de nd'airi bogau a foras, a pustis de
sa pregonadura de sa ley regionali 26 de su 97 is primus paperis ufitzialis scritus in sardu (una litra a su sindigu Milia de s'ufitziu de is arrelatas
pubricas); sa de tresi, su de airi postu in pei una scola manna de sardu cun s'agiudu e sa fiantza de sa Comissioni de s'Unioni Europea. E atras
chi imoi no cumbenit a circai. E duncas su Comunu at a sighiri, cun prus fortza e cumbincidura, a donai impellìda a is chi in tzittadi, e in is
biddas de acanta, bolint chistionai su sardu e produsiri curtura imperendi sa limba sarda.
Ligau: CABUDU DE TOTUS IS CHISTIONIS
Ligau: UN'ASSESSORAU PO SA LIMBA IN QUARTU SANT'ALENI
Ligau: ITA AT FATU, ITA EST FAENDI, ITA AT A FAI
