 Assessorau de sa Limba Sarda |
 |
COMUNU DE CUARTU SANT'ALENI
ASSESSORAU DE SA LINGUA SARDA
DISINNU DE DEFENTZA E AFORTIAMENTU DE SA LINGUA SARDA
CABUDU DE TOTUS IS CHISTIONIS
Su comunu de Cuartu Sant'Aleni tenit sa fidi e s'idea
chi is ominis chi bivint in Sardigna tengant abisongiu de
sa lingua sarda po istrinai una torrada noa de s'Autonomia.
Seus unu populu dissimbillanti, arrispetosu de is aturus,
chi no at tentu mai sa possibilidadi de bogai a craru s'identidadi
sua e chi bolit acciungi sa parti sua a s'umanidadi
intrea.
Est un isceberu politicu chi donat trettu a su progressu
e a s'amistadi cun tottu is populus de su mundu. Sa Sardinnia at sunfriu
sa prus grandu disugualidadi chi potzat essiri fata a unu
populu: sa de non podiri bogai a fora s'identidadi prus
sintzilla. Su sardu duncas cumbattendi sa disugualidadi
sua cumbatit totu is disugualidadis de su mundu.
Difendendi sa limba sua, difendit totu is limbas chi in
su mundu bolint nai calincuna cosa. Chi una cumbatta no
balit po totu is ominis, no balit a dda fairi.
Custa mōvida po sa lingua sarda serbit a fai is sardus
prus zittadinus de su mundu. Po essiri sardus no at a
baliri ne su nascimentu, ne s'arratza, ne su sanguni. E
nemancu sa terra ca unu podit abarrai sardu in Argentina
o Australia puru. Po biviri cun sa lingua nosta in custu
mundu de oi depeus cumprendiri ca cun custu mediu torrau
a craru depeus imparai a narri "cosas noas". S'identidadi
sarda est de tottus is sardus e de tottus is partidus
politicus: is de manu deretta e is de manu de manca. S'unidadi
de su populu sardu, sa paxi, s'amistadi funt is tareas de
custu treballu.
Po fai custu serbit s'identidadi disposta de sa limba.
Serbit una lingua arregulada e "standard" chenza is faddiduras de
una lingua scritta comenti est chistionada. A su cumentzu
podit parri una limba frida, amesturada e burda, ma tocat
a isciri ca is limbas mannas si funti strantaxadas aici
de su essi mortas o frimas comenti dialetus.
Po su comunu de Quartu Sant'Aleni fortzis est ancu chitzi
po bogai una grafia aunia e abettaus chi siat sa Regioni
a bogai a campu s'aunioni de is tramudas. Una commissioni
de istudius est treballendu po ndi bogai a campu unu
sardu unificau. Su Comunu de Quartu Sant'Aleni abettat is
dezzididuras de sa Regioni a suba de norma ortografica de
imperai, isperendu chi siat diciosa, fazzili de arreciri
po sa genti, de bonu sentidu, arrispettosa de s'unidadi
de su populu sardu. Po custu preguntat de essiri
iscurtada des'assessori regionali e de sa commissioni de
istudiosus. Po nai su parri suu in custa materia.
Su comunu de Cuartu pentzat ca , in su tempus presenti,
si depat passai, po auniri sa limba sarda, de duas
tramudas: una campidanesa e s'atra cabesusesa. Medas
pentzānt de mandai annanti su logudoresu feti: su comunu,
chi fait is interessus de is tzitadinus no podit essiri
de acordiu cun custu sceberu poita custu iat a essi unu
isballiu politicu. A medas su sardu iat a parri una limba
furistera o furesa. Cumbenit insandus a afortiai su
campidanesu puru comenti limba de curtura e comenti
grafia. Si sperat ca is dus variantis si potzant
amesturai puru pentzendu ca unu cras si potzānt, in
calincunu modu, auniri.
Comenti at fattu s'Europa po tramudai de is monedas de
donnia natzioni a su francu europeu (Euro), du at
abisongiu de una purrata de tempus po s'avesai a sa
novidadi. Aici iat a depi essiri po sa chistioni de sa
limba unificada puru, poita nemus podit essiri
svantaggiau. Custu tempus
Ligau: CABUDU DE TOTUS IS CHISTIONIS
Ligau: UN'ASSESSORAU PO SA LIMBA IN QUARTU SANT'ALENI
Ligau: ITA AT FATU, ITA EST FAENDI, ITA AT A FAI
